Elenita Roshi: Shqipëria po rrezikon të mbetet pa historianë, studimi i historisë është detyrë kombëtare
Interesi i të rinjve për studimin e historisë mbetet një nga sfidat kryesore të arsimit dhe kulturës në vend. Në një kohë kur informacioni qarkullon me shpejtësi të madhe dhe rrjetet sociale shpesh e zëvendësojnë leximin e thelluar, historia po perceptohet gjithnjë e më shumë si lëndë “e rëndë” dhe jo si një udhërrëfyes i domosdoshëm për të kuptuar të tashmen, transmeton Portalb.mk.
Drejtoresha e Muzeut Historik Kombëtar, Elenita Roshi, për RTSH ka theksuar se në vitet e ardhshme pritet një mungesë e theksuar e historianëve, duke rrezikuar jo vetëm kërkimin shkencor, por edhe ruajtjen dhe interpretimin e trashëgimisë kombëtare.
“Për fat të keq, na mungojnë ata që do të bëhen historianët e së ardhmes dhe prandaj jemi këtu, t’u kujtojmë që duhet të ruhet historia e kombit, objektet që tregohen në këtë muze, sepse nëpërmjet kësaj kuptohet e gjithë historia që kemi kaluar. Mbi të gjitha, duam të nxisim edukimin për të ruajtur objektet”, tha ajo.
Sipas saj, zgjedhja për të studiuar histori nuk lidhet vetëm me një profesion, por me një mision të rëndësishëm shoqëror. Ajo nënvizon se studimi i historisë përbën një detyrë patriotike, pasi përmes saj ruhen identiteti, kujtesa kolektive dhe vlerat mbi të cilat është ndërtuar shoqëria shqiptare.
“Roli ynë është që, në mënyrë më intensive, t’u kujtojmë shqiptarëve që studimi i historisë është një detyrim patriotik”, nënvizoi ajo.
Ajo i fton nxënësit që ndodhen përballë zgjedhjes së studimeve universitare ta shohin historinë si një fushë me vlera afatgjata, ku kontributi i tyre do të jetë i rëndësishëm për ruajtjen dhe përcjelljen e trashëgimisë kombëtare.
