Doganat e RMV-së një udhëtarit ia kanë konfiskuar 98 mijë euro

Më 26 korrik, rreth orës 21:00, në vendkalimin kufitar Bogorodicë të Maqedonisë të Veriut, është paraqitur një autobus me targa turke, i cili po qarkullonte në linjën mes Gostivarit dhe Stambollit. Gjatë kontrollit të autobusit dhe pasagjerëve, në çantën personale të njërit prej pasagjerëve, inspektorët doganor zbuluan 4 pako me para të padeklaruara të mbështjella me qese të zezë dhe ngjitës, në të cilat ka pasur gjithsej 100 mijë euro, transmeton Portalb.mk.

Sipas Ligjit për punë devizore, udhëtarit i janë kthyer 2 mijë euro, shumë që një banor mund ti nxjerrë pa mos i paraqitur, ndërsa të tjerat 98 mijë euro janë konfiskuar përkohësisht.

Ndaj personit është dorëzuar kallëzim përkatës në Gjykatën Themelore, njofton Drejtoria e Doganave të RMV-së.