Bashkimi Evropian e “hap derën” për qendra migrantësh jashtë kufijve të saj

Komisioni Evropian nuk e përjashton mundësinë që të sigurojë financim evropian për qendra në vende jashtë Bashkimit Evropian, ku do të strehoheshin migrantët pa të drejtë qëndrimi në BE, derisa të përgatitet kthimi i tyre në vendet e origjinës, raporton Kolegium.mk.

“Jemi të gatshëm të diskutojmë propozime të pjekura”, deklaroi zëdhënësi i Komisionit Evropian në një konferencë për media, duke iu përgjigjur pyetjeve të gazetarëve. Ai theksoi se shtetet anëtare përcaktojnë vetë se cilët migrantë nuk kanë bazë për qëndrim dhe duhet të kthehen.

Sipas tij, do të kthehen vetëm migrantët që kanë kaluar të gjithë procedurën e kërkimit të azilit dhe kanë marrë vendim përfundimtar për refuzimin e kërkesës së tyre.

Lidhur me takimin e pritshëm në Bruksel me përfaqësues të talebanëve për kthimin e shtetasve afganë pa të drejtë qëndrimi në BE, për të cilët është vlerësuar se paraqesin rrezik për sigurinë ose kanë kryer vepra të rënda penale, zëdhënësi tha se “puna po vazhdon”.

Ai kujtoi se një takim i tillë ishte kërkuar disa muaj më parë nga 20 vende të BE-së dhe të zonës Shengen, duke përsëritur se bisedimet do të zhvillohen në nivel teknik dhe nuk përbëjnë njohje të pushtetit taleban në Afganistan.

Ndryshimet e fundit në legjislacionin evropian për migracionin kanë krijuar mundësinë për ngritjen e qendrave jashtë BE-së, ku migrantët do të presin kthimin në vendet e tyre të origjinës pasi kërkesat e tyre për mbrojtje ndërkombëtare të jenë refuzuar.