U shkatërrua grupi që kundërligjshëm kryente shitblerje të drogës në RMV, shtatë persona u arrestuan
Policia e Maqedonisë së Veriut ka arrestuar shtatë persona nën dyshimet për organizim kriminal rreth shitblerjes se drogës. Policia vlerësoi se ky grup kriminal tashmë është shkatërruar, transmeton Portalb.mk.
Ky aksion policor u realizua në gjithsej 15 lokacione në Strumicë, Shkup dhe Shtip. Në Shkup u arrestuan dy persona, katër në Strumicë dhe një në Shtip. Policia ka konfiskuar dëshmi materiale që lidhen me krimin e organizuar.
Policia ka paralajmëruar kallëzim penal në lidhje me nenin 215 nga Kodi Penal.
Aksioni policor është kryer në bashkëpunim me prokurorin dhe përfaqësues të Njësisë për Intervenim të Shpejtë dhe njësisë “Tigrat”.
Sipas vlerësimit të fundit të Iniciativës Globale për Luftimin e Krimit të Organizuar Transnacional (GI-TOC), Maqedonia renditet e 18-ta nga 44 vende në Evropë, dhe e 103-ta nga 193 vende të analizuara në botë për sa i përket aktivitetit të krimit të organizuar.
Sipas raportit, në Maqedoni veprojnë disa rrjete kriminale, të cilat janë më aktive në trafikimin e drogës. Operacionet e tyre janë të përqendruara në Shkup, Tetovë, Kumanovë, Veles dhe Shtip. Disa nga grupet përdorin një nivel të lartë dhune dhe frikësimi, dhe disa prej tyre, siç deklarojnë autorët, kanë mbrojtje politike që lehtëson punën e tyre.
Raporti e identifikon Maqedoninë e Veriut si një pikë të rëndësishme tranziti për heroinën në rrugët që lidhin Afganistanin me Evropën Perëndimore nëpërmjet Turqisë dhe Ballkanit.
Ai thekson “bashkëpunimin e mirë” të kriminelëve maqedonas me aktorë kriminalë nga rajoni dhe Turqia, por edhe me rrjete ndërkombëtare si mafia ruse dhe italiane.
Tregu vendas i heroinës është i vogël, por vendndodhja e vendit e bën atë një pjesë të rëndësishme të zinxhirit rajonal të furnizimit. Vëllimi i sekuestrimeve ndryshon, gjë që, thonë ekspertët, tregon ndryshime në rrugët tregtare dhe konkurrencën midis grupeve.
Situata është e ngjashme me kokainën – tregu është i konsoliduar dhe përfshin grupe me lidhje të drejtpërdrejta me kartelet e furnizimit në Amerikën e Jugut. Edhe pse ka pasur operacione policore që kanë shkatërruar disa nga rrjetet, Maqedonia e Veriut mbetet pikë tranziti.
Raporti pohon se përplasjet midis grupeve rivale kanë çuar në incidente të dhunshme, veçanërisht në rajonin e Shkupit.
Kanabisi mbetet një nga problemet më të mëdha. Autorët paralajmërojnë se disa kompani me licenca për kanabis mjekësor janë të përfshira në tregti të paligjshme, duke shfrytëzuar boshllëqet në ligj.
“Korrupsioni ndërlikon më tej përpjekjet e mbikëqyrjes dhe Maqedonia e Veriut mbetet një vend kyç tranziti për dërgesat e kanabisit nga Shqipëria në tregjet evropiane. Pavarësisht masave të përforcuara të zbatimit, tregu i kanabisit vazhdon të rritet, duke përfituar si aktorët vendas ashtu edhe ata të huaj”, konstatojnë autorët e raportit.