Sindikata e punëtorëve të RTK-së do të padisë përgjegjësit institucionalë nëse nuk marrin paga deri më 14 gusht

Nëse deri më 14 gusht 2025 nuk realizohen mjetet për pagat e punëtorëve, Sindikata e Punëtorëve të RTK-së do të dorëzojë padinë në gjykatë përmes avokatit ndaj të gjithë përgjegjësve institucionalë, njoftuan nga kjo Sindikatë sot përmes një komunikate për mediat, transmeton Portalb.mk.

“Padia do të kërkojë përgjegjësi ligjore për situatën e rëndë financiare të krijuar brenda RTK-së, mos-ekzekutimin e pagave dhe cenimin e të drejtave themelore të punonjësve, si dhe për rrezikimin serioz të funksionimit të transmetuesit publik të Kosovës. Sot, më 8 gusht, pagat e punonjësve ende nuk janë ekzekutuar. Gjendja financiare është e rënduar, si për institucionin, ashtu edhe për stafin që përballet me vështirësi të mëdha ekonomike dhe sociale. Pavarësisht kësaj gjendjeje, punëtorët e RTK-së vazhdojnë ta mbajnë programin në funksion, me përkushtim të lartë profesional, duke mos lejuar ndërprerjen e informimit dhe shërbimeve për publikun”, thuhet në njoftim.

Sindikata i bën thirrje të gjithë përgjegjësve institucionalë që të ndërmarrin masa urgjente dhe serioze, për të parandaluar një krizë të thellë në funksionimin e RTK-së dhe për të siguruar të drejtat bazike të punonjësve.

Gjithashtu, Sindikata shpreh vendosmërinë për të ndërmarrë të gjitha format e lejuara ligjore të grevës dhe protestës, duke përfshirë:
• Grevën paralajmëruese,
• Grevën e pjesshme,
• Grevën e përgjithshme,
• Protestat publike paqësore

“Të gjitha këto masa do të ndërmerren në përputhje të plotë me Ligjin për Grevat dhe Kushtetutën e Republikës së Kosovës, si pjesë e mbrojtjes së të drejtave të ligjshme të punëtorëve dhe për të ruajtur dinjitetin dhe qëndrueshmërinë e RTK-së.

Njëherësh, u bëjmë thirrje të gjitha institucioneve financiare në Kosovë që të tregojnë mirëkuptim për situatën aktuale dhe të gjejnë mënyra për të mbështetur punëtorët e RTK-së që përballen me obligime financiare esenciale.

Lidhur me formën dhe kohën e protestës së radhës, Sindikata do të informojë publikun në ditët në vijim përmes kanaleve tona zyrtare”, thuhet në  njoftim.