Rusia e shpalli DW-në organizatë të padëshirueshme
Prokuroria e Përgjithshme e Rusisë po e klasifikon Deutsche Welle (DW), transmetuesin ndërkombëtar të Gjermanisë, si “organizatë të padëshirueshme”, sipas raportimeve të mediave ruse, transmeton Portalb.mk.
Ky klasifikim ishte kërkuar nga parlamenti rus, Duma Shtetërore, që në muajin gusht.
DW i bashkohet tashmë disa mediave, OJQ-ve dhe fondacioneve të tjera që kanë marrë më herët etiketën “të padëshirueshme”, përfshirë Radion Evropa e Lirë, Bellingcat, CORRECTIV, Reporterët pa kufinj dhe TV Rain.
Çfarë nënkupton klasifikimi “organizatë e padëshirueshme”?
Sipas ligjit aktual rus, shpallja si “organizatë e padëshirueshme” e bën çdo bashkëpunim me një organizatë të tillë vepër penale, e dënueshme me gjoba të rënda apo edhe me burgim.
Edhe shpërndarja e përmbajtjes së këtyre organizatave, përfshirë në rrjete sociale, është e paligjshme.
Çfarë ka thënë DW?
Drejtoresha e Përgjithshme e DW, Barbara Massing, ka deklaruar se ky veprim i autoriteteve ruse është tjetër shenjë se Kremlini synon të shtypë çdo liri të mendimit në vend.
“Rusia mund të na shpallë organizatë të padëshirueshme, por kjo nuk do të na ndalë,” tha ajo në një deklaratë.
“Kjo përpjekje e fundit për të heshtur mediat e lira nxjerr në pah përçmimin e hapur të regjimit rus ndaj lirisë së shtypit dhe zbulon frikën e tij nga qytetarët e vet, ata që kërkojnë informacion, mendojnë kritikisht dhe duan të mësojnë. DW do të mbetet e palëkundur në ofrimin e përmbajtjes gazetareske, duke u mundësuar njerëzve të formojnë opinionet e tyre,” theksoi Massing.
Presion në rritje ndaj DW-së në Rusi
Gjatë tre viteve të fundit dhe më shumë, DW ka ndier gjithnjë e më shumë efektet e goditjes së Kremlinit ndaj organizatave dhe mediave të financuara nga jashtë.
DW është shpallur “agjent i huaj” në Rusi që nga marsi i vitit 2022 dhe më herët ishte përballur me ndalim transmetimi.
Studioja e saj në Moskë u detyrua të zhvendosej, ndërsa faqja e internetit u bllokua në të gjitha gjuhët në të gjithë Rusinë.
DW në rusisht arriti rreth 10 milionë përdorues në javë në vitin 2025, kryesisht përmes përmbajtjes video.
Kjo e bën DW në rusisht një nga 10 shërbimet më të përdorura të DW-së.
“Pavarësisht censurës dhe bllokimit të shërbimeve tona nga qeveria ruse, shërbimi i DW-së në gjuhën ruse tani arrin më shumë njerëz se kurrë më parë,” tha Massing.
Çfarë është DW?
DW është transmetuesi ndërkombëtar i Gjermanisë. Si medium i pavarur, ai ofron lajme dhe informacione të paanshme në 32 gjuhë në mbarë botën.
DW fokusohet në tema si liria dhe të drejtat e njeriut, demokracia dhe sundimi i ligjit, tregtia botërore dhe drejtësia sociale, edukimi shëndetësor dhe mbrojtja e mjedisit, teknologjia dhe inovacioni.
Shërbimet televizive, online dhe radiofonike të DW-së arrijnë 337 milionë përdorues çdo javë.