Rrjeti për Mbrojtje nga Diskriminimi i kërkoi Kuvendit të shpall thirrje të re për anëtar të Komisionit
Rrjeti për Mbrojtje nga Diskriminimi kërkon nga Parlamenti që të shpallë urgjentisht thirrje të re publike për zgjedhjen e një anëtari të Komisionit për Parandalimin dhe Mbrojtjen nga Diskriminimi, pasi afati ligjor ka kaluar. Parlamenti zgjodhi vetëm dy anëtarë më 29 janar 2026, ndërsa thirrja e re duhej të publikohej deri më 8 shkurt. Rrjeti thekson se ky veprim është detyrim ligjor dhe thelbësor për funksionimin e Komisionit. Ata kërkojnë proces transparent, respektim të ligjit dhe përzgjedhje të një kandidati profesional dhe jopartiak. Rrjeti njofton se do të vazhdojë të monitorojë procesin e përzgjedhjes, transmeton Portalb.mk.
Sipas Ligjit për Parandalimin dhe Mbrojtjen nga Diskriminimi, nëse Parlamenti nuk zgjedh anëtarë të Komisionit, procedura e zgjedhjes përsëritet në tërësi duke publikuar menjëherë thirrje publike, dhe jo më vonë se brenda dhjetë ditësh. Duke pasur parasysh se Parlamenti zgjodhi dy anëtarë më 29.01.2026, afati për publikimin e një thirrjeje të re skadoi më 08.02.2026. Deri më sot, një thirrje e tillë nuk është publikuar”, thuhet në reagim.
Ata shtojnë se është koha e duhur që Parlamenti ta kuptojë seriozisht rëndësinë e Komisionit për Parandalimin dhe Mbrojtjen nga Diskriminimi si mbrojtës i dinjitetit të qytetarëve, i cili nga ana tjetër është baza për krijimin e një shoqërie të shëndetshme demokratike.
“Në këtë drejtim, dëshirojmë t’u kujtojmë deputetëve se ata kanë përgjegjësi, para së gjithash, të veprojnë në përputhje me ligjin dhe autorizimet e tyre, të cilat përfshijnë:
- Krijimin e një liste të kandidatëve të regjistruar që plotësojnë kërkesat e përcaktuara në Ligjin për Parandalimin dhe Mbrojtjen nga Diskriminimi;
- Prezencë dhe pjesëmarrje aktive gjatë seancës për të prezantuar kandidatët që kanë përmbushur kërkesat;
- Njoftimin në kohë të organizatave të shoqërisë civile që merren me këtë temë për datën dhe orën e kësaj seance, si dhe dorëzimin në kohë të dokumenteve për kandidatët;
- Mundësimin e një procesi transparent për monitorimin e seancës së Komisionit të Zgjedhjeve dhe Emërimeve në të cilën do të merret vendim për propozimin për anëtar të Komisionit”, thonë nga rrjeti.
Ata shtojnë se Ligji për Parandalimin dhe Mbrojtjen nga Diskriminimi parashikon kërkesa shumë të gjera që kandidatët duhet të plotësojnë, “prandaj presim që nuk do të jetë problem i madh të veçohen ata që plotësojnë të gjitha kërkesat”:
- 1) të jenë shtetas të Republikës së Maqedonisë së Veriut;
- 2) të ketë fituar 240 kredite ECTS ose nivelin VII/1 të arsimit dhe të ketë të paktën shtatë vjet përvojë pune në fushën e të drejtave të njeriut, nga të cilat pesë vjet në fushën e barazisë dhe mosdiskriminimit;
- 3) në kohën e përzgjedhjes, të mos jetë dënuar me burgim për më shumë se gjashtë muaj ose të mos i jetë ndaluar kryerja e një profesioni, aktiviteti ose detyre me vendim gjyqësor të formës së prerë dhe
- 4) të mos mbajë detyrë në një parti politike.
Deputetët e Kuvendit të Maqedonisë së Veriut më 28 janar e zgjodhën Limko Bejzaroskin dhe Natasha Amdiun si anëtarë të Komisionit për Parandalim dhe Mbrojtje nga Diskriminimi.
Kandidatët e propozuar u miratuan me 62 vota “për” dhe një deputet abstenoi.
Kandidatja Xhihan Ahmed, dha dorëheqje pasi u kritikua ashpër në opinion për paraqitjen e saj në intervistën publike, ku në vend që të fliste për Konventën e Stambollit, dokument thelbësor për mbrojtjen nga dhuna me bazë gjinore dhe barazinë gjinore, ajo foli për Stambollin dhe periudhën e Ataturkut.