Rritja e çmimit të energjisë elektrike nuk mund të shmangej, tha kreu i KRRE-së Bislimoski
Kryetari i Komisionit Rregullator të Energjetikës, Marko Bislimoski, në një intervistë për “360 Gradë” në MRT 1 tha se rritja e fundit e çmimit të energjisë elektrike nuk mund të shmangej. Sipas tij, duhet të tregohet mirëkuptim për “Elektranat e Maqedonisë së Veriut” (EMV) sepse kompania shtetërore, siç tha ai, duhet të qëndrojë në këmbë të shëndosha, transmeton Portalb.mk.
“Në atë pjesë ku rregullojmë çmimet, në pjesën e tarifave të rrjetit, ulëm çmimin për transmetim dhe shpërndarje dhe në tërësi e ulëm me 5 përqind sepse kishte hapësirë për ta ulur. Ulëm edhe çmimin e MEPSO-s, ulëm edhe çmimin e ‘Elektroshpërndarjes’, ulëm edhe çmimin e MEMO-s. Në pjesën e EMV-së, të gjithë duhet të tregojmë mirëkuptim. Situata është e vështirë, EMV po operon me humbje dhe EMV është kompani kyçe në sektorin e energjisë. Për EMV-në, pavarësisht nëse do të mbijetojë apo jo, nuk kemi skenar B. EMV duhet të qëndrojë në këmbë të shëndosha, EMV duhet të rrisë prodhimin e energjisë elektrike, por duhet ta shohim ngadalë EMV-në jo vetëm si kompani prodhimi, por edhe si një kompani që, përveç prodhimit të energjisë elektrike, shet edhe energji elektrike”, tha Bislimoski.
Kur u pyet nëse termocentralet shtetërore mund të kishin mbetur në 62 euro për megavat-orë, çmim me të cilin ia kishin shitur energjinë elektrike furnizuesit universal EVN Home, dhe jo ta kishin rritur atë në 65 euro, Bislimoski tha se nëse çmimi do të kishte mbetur i njëjtë, situata do të ishte përkeqësuar.
“EMV edhe në vitet 2024, 2023, 2022 dhe 2021 i mbylli me humbje. Tani nuk e di si ishte, ndoshta në vitin 2023 ose 2024 tregoi njëfarë fitimi, por kjo ishte kryesisht për shkak të transfertave që u bënë nga buxheti i shtetit. Pra, nëse çmimi do të kishte mbetur i njëjtë, situata do të ishte përkeqësuar edhe më shumë. EMV merr rrezikun e sigurimit të energjisë elektrike për nevojat familjare me 65 euro, dhe në realitet çmimi i saj i prodhimit është midis 90 dhe 100 euro për megavat-orë. Pra, që nga fillimi, EMV, për të siguruar rreth tre miliardë e 200 milionë kilovat-orë, ka operuar me humbje. Përveç kësaj, EMV shet energji elektrike edhe te ‘Electrodistribucija’ për të mbuluar humbjet e saj, të cilat janë rreth 800 milionë kilovat-orë, por çmimi atje është 105 euro për megavat-orë. Pra, aty ku ka shitje më të mëdha, ka edhe humbjet më të mëdha. Dhe tani, nëse do të kishte mbetur.. 62 euro, humbjet financiare në EMV do të ishin rritur edhe më shumë, kështu që duhet t’i japim EMV-së një shans që të rimëkëmbet ngadalë financiarisht dhe mendoj se kjo do të ndodhë në periudhën e ardhshme”, beson ai.
I pyetur nëse mund të pritet padi para Gjykatës Administrative nga “EVN Home” sepse rritja e çmimit të energjisë elektrike është më e vogël se ajo që kërkoi furnizuesi universal, Bislimoski u përgjigj:
“Furnizuesi universal është i detyruar të zbatojë vendimin tonë, dhe unë personalisht besoj se – po, vendimi ynë do të përfundojë, do të apelohet nga “EVN Home” para Gjykatës Administrative, siç kanë qenë shumë vendime më parë. Deri më tani, kemi marrë këto vendime nga Gjykata Administrative”.
Kujtojmë se Komisioni Rregullator i Energjetikës miratoi vendim për rritjen e çmimit të energjisë elektrike në të gjitha blloqet e konsumatorëve. Sipas vendimit, i cili do të zbatohet nga 1 janari 2026, rritja e çmimit varion nga 2.45 deri në 3.84 përqind, varësisht nga blloku në të cilin bie konsumi. Çmimi i energjisë elektrike të lirë do të jetë gjithashtu më i lartë për 2.5 përqind.