RMV, 2 mijë të punësuar në “Pyjet kombëtare” në grevë pasi s’ka rroga për janarin, ndërsa ka 450 punësime të reja
Nuk ka rroga për punëtorët e Ndërmarrjes Publike (NP) “Pyjet Kombëtare”, por ka para për vetura të reja zyrtare dhe për 450 vende të reja pune, u tha në konferencën e sotme për media të Sindikatës. Dy mijë punonjës dolën në grevë, pasi nuk kanë rrogë për muajin janar dhe afati i pagesës për muajin shkurt po afron, transmeton Portalb.mk.
“Paga e fundit që kanë marrë punëtorët ka qenë paga e dhjetorit dhe është ulur në mënyrë lineare për 6800 denarë, të cilat janë paguar këto ditë. Është e padenjë, në kushtet e rritjes ditore të harxhimevetë jetesës, që punonjësit të mos marrin rrogë. Kërkesat nuk janë vetëm pagesa e rrogës por edhe pagesa e shtesave në terren për disa muaj. Nëse menaxhmenti nuk mund t’i paguajë pagat, le të marrë përgjegjësi dhe të japë dorëheqje”, tha Sllobodan Trendafilov, kryetar i Lidhjes së Sindikatave të Maqedonisë (LSM).
Greva e punonjësve zhvillohet në ambientet e punës. Tre javë më parë, kur përfaqësuesit e LSM-së po bisedonin me menaxhmentin e “Pyjeve Kombëtare”, u premtua se paga do të paguhet të nesërmen. Që atëherë kanë kaluar 20 ditë, por nuk ka rrogë.
“Drejtimi i ‘Pyjeve Kombëtare’ ka gjithmonë një justifikim për pagat e papaguara. Arsyetimi është se ata prisin kredi, para që duhet t’i kthenin këta kolegë ose një injeksion financiar nga qeveria. Nëse dikush tashmë është menaxher i NP, ai duhet të jetë në gjendje t’uq paguajë punonjësverrogat. Kohë më parë kjo NP ka pasur tender për blerjen e veturave zyrtare, ndërsa rroga nuk u është paguar. Kohët e fundit janë punësuar 450 persona dhe ata që shkonin në parti dhe kërkonin punë, tani vijnë në sindikatë dhe kërkojnë pagë”, shtoi Trendafilov.
Po përsëriten kushtet me NP “Pyjet Kombëtare”, paraprakisht “Pyjet e Maqedonisë”. Dhjetë vjet më parë ishte edhe në krizë financiare, ndaj pati greva. Dhe në këtë NP, punësimi masiv i qindra njerëzve përsëritet për një numër të caktuar vitesh.
Kujtojmë se paraprakisht grevë pati edhe në Fondin e Sigurimeve Shëndetësore (FSSh) për shkak të rekomandimit të Qeverisë për uljen e pagave me 21 përqind.