Ribalanci i buxhetit të Shkupit, do të ndërtohet rrethrrotullim te Banka Popullore dhe garazhe në kate në Qendrën Klinike

By N. D. On 12/03/2026 15:10

Parkingu te Qendra Klinike Universitare "Nënë Tereza" në Shkup. Foto: Fisnik Xhelili/Portalb.mk

Qyteti i Shkupit do të ndërtojë një rrethrrotullim të ri pranë Bankës Popullore, garazhe në kate në Qendrën Klinike dhe fotovoltaikë në shkolla. Fondet për këto investime do të sigurohen nga rebalanci i buxhetit që mori dritë jeshile nga Këshilli i Shkupit sot, transmeton Portalb.mk.

Autoritetet e qytetit informojnë se fondet në buxhet po rriten me 166 milionë denarë shtesë, të destinuara për investime të reja kapitale. Amendamenti parashikon ndërtimin e një rrethrrotullimi të ri pranë Bankës Popullore për të përmirësuar rrjedhën e trafikut në një nga pikat më të ngarkuara të trafikut në qytet.

Paralelisht, Qyteti i Shkupit do të fillojë edhe ndërtimin e dy garazheve në kate brenda Qendrës Klinike “Nënë Tereza”. Projekti parashikon rreth 500 vende të reja parkimi dhe një investim prej rreth tre milionë eurosh, i cili pritet të zvogëlojë ndjeshëm problemin e gjatë me parkimin në kompleksin klinik.

Buxheti parashikon gjithashtu investime në arsim, përmes instalimit të pompave të ngrohjes në shkolla, të cilat do të eliminojnë ngrohjen me naftë, si dhe instalimin e paneleve fotovoltaike, rinovimin e oborreve të shkollave dhe pajisje të reja urbane.

Kujtojmë se parkimi në këtë pjesë të Shkupit është një problem kronik që asnjë ministër i shëndetësisë nuk ka gjetur kurrë një mënyrë për ta zgjidhur, megjithëse shumë prej tyre, kur u emëruan në detyrë, gjëja e parë që premtuan ishte pikërisht kjo – zgjidhja e problemit të parkimit.

Në 10 vitet e fundit, kanë ndryshuar 9 ministra të shëndetësisë. Imer Selmani, Bujar Osmani, Nikolla Todorov, Arben Taravari (2 mandate), Venko Filipçe, Bekim Sali, Fatmir Mexhiti, Ilir Demiri dhe Azir Aliu (aktual). Shumë prej tyre premtuan zgjidhjen e kaosit.

Ish-ministri i Shëndetësisë Fatmir Mexhiti, kur mori detyrën, tha në një takim informues me gazetarët se së pari do të merrej me kaosin me parkingun në Qendrën Klinike, por kjo nuk ndodhi.

Më 7 mars të vitit të kaluar, kur Arben Taravari ishte ministër i Shëndetësisë, kompania “Gjoka Construction” nga Shqipëria ishte e vetmja që aplikoi në thirrjen e shpallur për menaxhimin e parkingut në Qendrën Klinike. Taravari tha se nuk e dinte se çfarë portofoli kishte kjo kompani. Kjo kompani duhej të ndërtonte garazhe shumëkatëshe brenda “gjashtë muajsh deri në një vit”, por kjo nuk ndodhi sepse qeveria nuk e miratoi planin që kjo kompani ta ndërtonte atë.