Rasti “Onkologjia”: Prokuroria pret vendimin dhe shpjegimin për Peshevskën pastaj do të vendosë nëse do të apelojë
Prokuroria Themelore Publike Shkup do të presë të marrë vendimin dhe shpjegimin për dënimin e shqiptuar, dhe më pas do të vendosë nëse do të apelojë lartësinë e dënimit që Gjykata Themelore Penale Shkup ia shqiptoi dje Meri Peshevskës në rastin “Onkologjia”, i cili ka të bëjë me trajtimin neglizhent të pacientëve me kancer, transmeton Portalb.mk.
Kjo është përgjigjja e Prokurorisë Publike ndaj pyetjeve gazetareske pas reagimeve të sotme ndaj vendimit për Peshevskën, veçanërisht në pjesën që ka të bëjë me sanksionin e shqiptuar.
“Pranimi i fajësisë dhe dënimi i shpallur për njërin nga të pandehurit në rastin “Onkologjia” është konfirmim i meritave të pretendimeve në aktakuzën e ngritur nga Prokuroria Themelore Publike Shkup. Lartësia e sanksionit për krimin e kryer përcaktohet nga Gjykata, dhe prokuroria ende nuk e ka marrë vendimin dhe shpjegimin për dënimin e shqiptuar. Pas marrjes së tij, Prokuroria Publike do të vendosë nëse do të paraqesë ankesë në lidhje me lartësinë e sanksionit”, thuhet në përgjigjen e Prokurorisë Publike të Republikës së Maqedonisë së Veriut.
Partia në pushtet VMRO-DPMNE reagoi sot ndaj dënimit me kusht, duke e përshkruar vendimin e Gjykatës si skandaloz, sepse krimi për të cilin akuzohet mjekja mbart një dënim me burg deri në tre vjet.
Gazetarët gjithashtu i kërkuan sot kryeministrit Hristijan Mickoski koment mbi vendimin.
Mickoski nuk komentoi drejtpërdrejt mbi vendimin, por iu referua pikëpamjeve të tij të përgjithshme mbi gjyqësorin dhe prokurorinë, të cilat, siç tha ai, janë deklaruar dhe diskutuar shumë herë deri më tani.
Kryeministri i paraqiti ato në një takim informues me gazetarët të premten, duke folur për Agjendën e Reformave që përfshin gjyqësorin, dhe i përsëriti ato sot.
Ai deklaroi se sa herë që flitet për vonesa në procesin e miratimit të ligjeve që nënkuptojnë reforma në gjyqësor dhe prokurori, publiku duhet të dijë se ato ligje, ose gjashtë në total, në thelb i referohen një rritjeje të fondeve që duhet të ndahen nga buxheti për gjyqësorin dhe prokurorinë. Sipas reformave të parashikuara, ajo përqindje për gjykatat duhet të jetë 0.8 përqind e PBB-së dhe 0.5 përqind për prokurorinë.
Këto rritje të buxhetit, sipas Mickoskit, do të nënkuptojnë drejtpërdrejt një rritje të pagave të gjyqtarëve dhe prokurorëve, të cilët, siç thotë ai, nuk i meritojnë as pagat që marrin tani.
Ndryshe, Gjykata Themelore Penale në Shkup, më 22 shtator e shpalli Meri Peshevskë fajtore për vepra të rënda kundër shëndetit të njeriut në rastin “Onkologji”, i cili ka të bëjë me trajtimin neglizhent të pacientëve, dhe e dënoi atë me dënim me kusht prej dy vitesh burg. Siç tha gjykatësja Snezhana Markovska në vendimin e saj, dënimin me dy vite burg e pandehura nuk do ta vuajë nëse Peshevska nuk kryen krim tjetër në pesë vitet e ardhshme. Përveç dënimit, Peshevska u urdhërua të paguante tarifë gjyqësore, ndërsa kërkesat pasurore dhe ligjore të të afërmve të pacientëve u drejtuan për t’u trajtuar në një gjykatë civile.