Prokuroria ngriti aktakuza për pesë persona në rastin “Gërçeci”
Pas kryerjes së procedurës gjithëpërfshirëse hetimore që është zhvilluar nga fillimi i këtij viti, prokurori në fjalë nga Prokuroria Themelore Publike për Ndjekjen e Krimit të Organizuar dhe Korrupsionit sot ka dorëzuar aktakuzë kundër pesë personave në Gjykatën Themelore Penale të Shkupit, transmeton Portalb.mk.
“Sipas përshkrimit të dhënë në pjesën e parë të dispozitivit të aktakuzës, tre nga të pandehurit, si anëtarë të grupit të organizuar kriminal ndërkombëtar, kanë kryer veprën e prodhimit dhe shpërndarjes së paautorizuar të drogave narkotike, substancave psikotrope dhe prekursorëve nga neni 215 paragrafi 3 i Kodit Penal. Si anëtarë të një grupi të organizuar kriminal ndërkombëtar, së bashku me persona të tjerë, disa prej të cilëve janë të dyshuar në këtë rast dhe janë të padisponueshëm nga organet ligjzbatuese, disa kanë vdekur, e disa tashmë janë dënuar, kanë vepruar së bashku, secili në rolin e vet të prokurimit, transferimit, mbajtjes, shitjes dhe ndërmjetësimit të paautorizuar në blerje dhe shitje. Në disa raste, gjatë vitit 2020, këta tre të pandehur janë përfshirë në blerjen e paautorizuar të 15.005 kilogramëve lëndë narkotike – kokainë, transferimin dhe lëshimin e saj në qarkullim në vend”, thuhet në njoftimin e Prokurorisë.
Grupi kriminal ndërkombëtar, anëtarë të të cilit janë të pandehurit, ka vepruar në periudhën kohore prej datës 14.06.2019 deri më datë 09.03.2021, gjatë së cilës në disa raste ka kryer blerjen e paautorizuar të lëndës narkotike – kokainë nga vendet e Amerikës së Jugut, duke organizuar transferimi përmes rrugëve ujore në vendet evropiane. Transferimi i paautorizuar i lëndës narkotike – kokainë e destinuar për shitje të paautorizuar në Republikën e Maqedonisë nga Belgjika dhe nga Republika e Shqipërisë përmes Kosovës është organizuar nga njëri prej të dyshuarve të rastit – i padisponueshëm për organet e rendit, i cili është organizator i grupit në Republikën e Maqedonisë.
Dy të pandehurit e tjerë akuzohen për kryerjen e veprave penale Bashkim kriminal nga neni 394 paragrafi 3 dhe Vrasje nga neni 123 paragrafi 2 pika 5 të Kodit Penal. Gjegjësisht, në periudhën kohore nga dhjetori 2019 deri në mars 2021, organizatori i dyshuar i grupit kriminal të lartpërmendur i cili ndodhet në arrati, së bashku me një person tjetër të padisponueshëm për organet e rendit dhe dy persona të vdekur kanë krijuar një grup kriminal, qëllimi i të cilit ishte për të kryer krimin e Vrasjes me hakmarrje dhe me urdhër. Përveç dy të ndjerëve, anëtarë të grupit janë bërë edhe dy të dyshuar të rastit – të padisponueshëm nga organet e rendit, si dhe dy të pandehurit. Organizatorët e grupit kriminal përgatitën plane dhe morën vendime se kujt, kur, ku dhe në çfarë mënyre duhej të privohej nga jeta. Vendimet zbatoheshin personalisht ose nëpërmjet anëtarëve të grupit të organizuar kriminal, të cilët i pranonin dhe i zbatonin dhe kontratat, urdhrat dhe udhëzimet transmetoheshin në kontakte të drejtpërdrejta ose nëpërmjet telefonave të koduar në të cilët ishte instaluar aplikacioni “SKY”. Kështu, organizatorët, në bazë të njohurive të mëparshme në të cilat ishin të bindur plotësisht, se një person dyshohet se ka qenë pjesëmarrës dhe udhëheqës në shkëmbimin e zjarrit në hotelin “Aleksandar Palace” në Shkup, ku disa nga anëtarët e grupit janë qëlluar me armë zjarri, filluan të bëjnë planin për t’i marrë jetën personit. Pasi morën vendimin për ta vrarë, ata punësuan dy të pandehurit dhe një person tjetër tashmë të ndjerë, duke u dhënë urdhër që të ndiqnin lëvizjet e tij. Pas disa tentativave të pasuksesshme më datë 05.03.2020, të pandehurit dhe tashmë i ndjeri, duke përdorur aparate sinjalizuese drite – flasher, kanë ndaluar veturën në të cilën ndodhej personi që ishte objektivi i tyre me tre persona të tjerë dhe e kanë vrarë me automatik dhe pistoletë, si dhe një person tjetër të ulur pas tij.
Me aktakuzë, prokurori në fjalë ka paraqitur edhe propozim të veçantë për të pandehurit për vazhdimin e paraburgimit për shkak të mundësisë që të pandehurit të ikin apo të përsërisin veprën penale.
“Urdhri për zhvillimin e procedurës hetimore është miratuar në janar për 15 persona. Për katër persona të cilët janë të padisponueshëm nga organet e rendit, prokuroria përmes Ministrisë së Drejtësisë ka ndërmarrë të gjitha veprimet e nevojshme në përputhje me Ligjin për Ndihmën Ndërkombëtare në Çështjet Penale. Kështu, dokumentet për ekstradim në Emiratet e Bashkuara Arabe janë dorëzuar për dy persona, për një person nga Republika e Kroacisë dhe për një person autoriteteve spanjolle. Procedurat e ekstradimit zhvillohen sipas ligjeve procedurale të vendeve ku ndodhen të dyshuarit dhe procedura hetimore për ta do të vazhdojë pas sigurimit të tyre, si dhe për të dyshuarit e tjerë”, thuhet në njoftim.
Kujtojmë se me 28 janar 2024 pesë nga gjashtë personat e arrestuar nga fshati Gërçec i Shkupit, Gjykata Themelore Penale Shkup u caktoi paraburgim prej 30 ditësh.
Rivaliteti mes grupeve kriminale fillon prej vitit 2010, kur “kronika e zezë” fillon të mbushet me incidente, vrasje dhe gjuajtje bombash mes klaneve të ndara.
Përleshjet janë ashpërsuar kur në nëntor të vitit 2013-të është vrarë 46-vjeçari Xhelal Ajeti në çajtoren e tij “Te Xhela” në Hasanbeg. Sulmi ndaj tij është i ngjashëm me të 6 marsit. Vrasësi, i maskuar dhe me armë ka hyrë në çajtore dhe e ka vrarë Ajetin me 30 plumba. Ajeti asokohe ishte i fajdexhi i njohur dhe figurë me ndikim në nëntokën e drogës.
Paraprakisht, në vitin 2005, si pasojë e plagës së marrë nga arma e zjarrit ka vdekur vëllai i tij, Nexhmedin, ndërkaq në shtator të vitit 2018-të është vrarë edhe vëllai i tij Naim Bellanoca duke lëvizur në një automjet në rrugën “Ruzveltova” të Shkupit.
Kjo në nëntokën është llogaritur se grupi “Bellanoca” e ka humbur primatin e tregut të narkotikëve. Por, në vitin 2019-të ka vijuar përleshje e re, kur pesë persona të maskuar kanë dalë nga një automjet dhe kanë gjuajtur drejt restorantit në hotelin “Aleksandar Pallas”, ku kanë qëndruar rivalët e “Bellanocës”.
Gjatë sulmit në Aleksandar Pallas, një polic i cili ka qenë me rroba civile dhe ka qenë duke qëndruar me grupin në tavolinë, ka parandaluar që sulmi të jetë fatal. Ai ka nxjerrë pistoletën zyrtare dhe ka gjuajtur në drejtim të sulmuesve. Rasti nuk u zbardh.
Sulmuesit janë larguar me xhip “Tuareg” i cili ka pasur targa të vjedhura, ndërkaq Policia e ka gjetur automjetin të djegur në periferi të Shkupit. Kjo përplasje, llogaritej se ishte për tregun e kokainës.
Në grupin e sulmuar, përveç Jeton Krivanjevës, ishte edhe Kamer Idrizi, i cili u vra në maj të vitit 2021, në një atentat duke lëvizur me makinë. Një vjet më vonë dy sulmues të armatosur me pushka automatike kanë hyrë në një çajtore në rrugën “Braka Rexhepagiq” në afërsi të Shkollës Fillore “Imri Elezi” të Çairit të Shkupit dhe e kanë vrarë Jonuz Idrizin, vëllaun e Kamerit.