Pendarovski në Konferencën rajonale për gjini dhe siguri: Për herë të parë në histori emërova grua në një pozitë që udhëhiqej vetëm nga burrat
Presidenti Stevo Pendarovski sot foli në Konferencën Rajonale për Gjini dhe Siguri – Shkup 2024, organizuar nga Misioni i OSBE-së në Shkup dhe ODIHR. Ai tha se nuk është rastësi që kjo konferencë po mbahet në prag të 8 Marsit – Ditës Ndërkombëtare të Gruas, pasi synon të na ndihmojë të rikthehemi në kuptimin autentik të kësaj dite të rëndësishme. Dhe kjo është arritja e barazisë së vërtetë gjinore në çdo segment të shoqërisë, duke përfshirë edhe sektorin e sigurisë, tha Pendarovski, transmeton Portalb.mk.
“Fokusi i kryesimit tonë të vitit të kaluar me OSBE-në ishte promovimi i sigurisë njerëzore, prandaj edhe slogani ishte “Bëhet fjalë për njerëzit”. Kuptohet që më të thirrurit për këtë çështje janë shërbimet e sigurisë, në radhë të parë policia, e cila ka një rol të pazëvendësueshëm në zbatimin e ligjeve, në ruajtjen e rendit, në respektimin e të drejtave dhe lirive të njeriut dhe në ruajtjen e kufirit shtetëror. Përmes kryerjes së këtyre detyrave të rëndësishme, policia ruan gjënë më të vlefshme që ka një shtet, që është besimi i qytetarëve të Maqedonisë në vendin e tyre dhe në institucionet e tij”, deklaroi presidenti.
Ai shtoi se disa hulumtime dhe raporte tregojnë se gratë kanë një rol të rëndësishëm në ndërtimin e një shoqërie të qëndrueshme dhe demokratike. Me një përfshirje më të madhe të grave në polici, në të gjitha nivelet dhe në të gjithë sektorët, qendrat, departamentet dhe njësitë, tha ai, funksionimi i institucionit në tërësi vetëm sa do të përmirësohet.
“Edhe pse konferenca e sotme i kushtohet grave në polici, e cila, nga ana tjetër, është nën juridiksionin e Qeverisë, dëshiroj të ndaj shkurtimisht përvojën time në kuadër të kompetencave të mia. Si Komandant i Përgjithshëm, për herë të parë në historinë tonë, emërova një grua adjutante. Si president, unë përpiqem për ekuilibrin gjinor si në pozitat më të ulëta ashtu edhe në ato më të larta në kabinetin tim. Dhe unë po i bëj të gjitha këto sepse kështu dua të kontribuoj në avancimin e barazisë gjinore në Maqedoninë e Veriut”, tha Pendarovski.
Sipas tij, misioni i OSBE-së ofron mbështetje përmes Programit të Mentorimit Gjinor për Policinë, i cili tashmë ka filluar të japë rezultate dhe të sjellë ndryshime në kulturën institucionale të Ministrisë së Punëve të Brendshme. Por ky program, nënvizoi Pendarovski, nuk duhet të jetë vetëm një aktivitet vetëm një herë, por pjesë e trajnimit standard institucional në Ministri.
“Së fundmi u informuam se në Repartin e qenëve zyrarë në Ministrinë e Brendshme u promovua drejtuesja e parë femër e një qeni zyrtar të trajnuar për zbulimin e armëve të zjarrit dhe municionit. Ky është një shembull që duhet ndjekur në çdo segment të sigurisë. Kjo nënkupton jo vetëm rritjen e numrit të grave në polici, por edhe mbështetjen e avancimit të tyre në karrierë në çdo sektor, në çdo njësi. Një pjesë kyçe e reformave evropiane për të cilat flasim kaq shumë është lufta kundër stereotipeve dhe paragjykimeve të së kaluarës që i vendosin gratë në një pozitë të pabarabartë në sektorin e sigurisë. Ne duhet të ndryshojmë ato zakone që janë të rrënjosura thellë në mentalitetin tonë”, përfundoi Pendarovski.
Ai u shpreh i bindur se kjo konferencë do të na japë mundësinë për të shkëmbyer përvojat rajonale, për të ndarë mësimet e nxjerra, për të përshpejtuar zbatimin e politikave gjinore në fushën e sigurisë, duke kontribuar kështu në ndërtimin e shoqërive më të drejta dhe më të sigurta.
Kujtojmë se statistikat së fundmi treguan se djemtë janë grupi i dytë më i madh i autorëve të dhunës në familje ndaj grave në Maqedoni, pas grupit të parë, baballarëve të tyre. Burrat ose partnerët intimë (aktual dhe ish) përbëjnë 63 për qind të vrasjeve dhe dhunimit të femrave. Vrasjet dhe dhuna ndaj nënave janë rritur në 16 për qind të numrit të përgjithshëm të rrahjeve dhe femicideve.