Osmani para shefave të misioneve të OSBE-së në Serbi, Kosovë dhe Shkup prezantoi planin për deeskalim të situatës në veri të Kosovës

Kryesuesi i OSBE-së dhe ministri i Punëve të Jashtme, Bujar Osmani sot në Shkup zhvilloi takim me shefat e misioneve të OSBE-së në Serbi, Kosovë dhe në Shkup, ambasadorët Jan Bratu, Majkëll Davenport dhe Kilian Vall, në fokus të së cilit, siç informojnë nga MPJ, ka qenë situata në veri të Kosovës dhe marrëdhëniet mes Beogradit dhe Prishtinës, njofton Portalb.

Osmani para ambasadorëve të OSBE-së e ka prezantuar planin nëntë pikësh, i cili duhet të ndihmojë në deeskalimin e situatës dhe të kontribuojë në arritjen e paqes dhe stabilitetit, si dhe kthimin e serbëve të Kosovës në institucione dhe procese demokratike.

“Është inkurajuese të dëgjosh mendimet e tyre për perspektivat e mundshme të planit për deeskalimin e situatës që kam paraqitur si Kryesues i OSBE-së. Udhërrëfyesi i ofruar inkurajon atmosferë të dialogut dhe të bashkëpunimit”, tha Osmani në takim, thuhet në kumtesën nga MPJ.

Krahas kësaj, Osmani u ka prezantuar shefave të misioneve të OSBE-së në Serbi, Kosovë dhe Shkup edhe prioritetet e kryesimit të Maqedonisë së Veriut me OSBE-në me fokus Europën Juglindore. Këto prioritete synojnë përforcimin e besimit, luftën kundër korrupsionit dhe aksionin klimatik.

“Pajtimi është i një rëndësie të veçantë si prioritet kryesor, një hap përpara drejt arritjes së paqes së qëndrueshme dhe bashkëpunimit në rajon”, theksoi Osmani.

Në drejtim të prioriteteve të Kryesimit të Maqedonisë së Veriut me OSBE-në, Osmani dhe ambasadorët kanë diskutuar edhe për Konferencën e ardhshme kundër korrupsionit në Europën Juglindore, e cila do të mbahet në vend.