Një punonjës në AUV mori rrogë me vite të tëra, por nuk shkonte në punë – jashtëligjshëm iu paguan pothuajse 19 mijë euro

Pesë punonjës të Agjencisë së Ushqimit dhe Veterinarisë (AUV) janë akuzuar për vepra penale nën dyshimin për shpërdorim të detyrës dhe autoritetit zyrtar, transmeton Portalb.mk.

Personi i parë i akuzuar është R.E. (51) nga fshati Sllupçan, punonjës i degës së AUV-së në Kumanovë. Sipas Ministrisë së Brendshme, nga 1 dhjetori 2018 deri më 30 prill 2024, ai nuk ka ardhur fare në vendin e tij të punës si arkivist i ri, por ka marrë rregullisht pagën dhe kontributet e tij.

Dy drejtorë të AUV-së me vetëdije e kanë lejuar një praktikë të tillë.

“I pandehuri i dytë, Z.A. (59) nga Shkupi, ushtrues detyre drejtor i AUV deri më 14.12.2020, me vetëdije i lejoi të pandehurit të parë të merrte pagë dhe kontribute edhe pse ai nuk i kryente detyrat e tij të punës. I pandehuri i tretë, N.B. (61) nga Manastiri, ushtrues detyre drejtor i AUV, nga 15.12.2020 deri më 03.07.2024, lejoi vazhdimin e pagesës së pagave për R.E. i cili nuk u paraqit në punë gjatë gjithë angazhimit të tij në punë”, deklaron Ministria e Brendshme.

Padi penale është ngritur edhe kundër udhëheqësit të departamentit të financave në AUV, 59-vjeçarit A.B. nga Shkupi, i cili nga dhjetori 2018 deri në prill 2024, pa kontrolluar rregullsinë, ka nënshkruar raporte financiare dhe ka miratuar pagesën e pagave dhe kontributeve për punonjësin edhe pse ai nuk ishte në listat për prezencë.

“Personi i pestë i raportuar, S.K. (58) nga Shtipi, i punësuar si udhëheqës departamenti në Agjenci, nga dhjetori 2018 deri në prill 2024 nuk ka ndërmarrë masa për të parandaluar situatën e paligjshme në lidhje me personin e parë të raportuar”, shtoi Ministria e Brendshme.

Ministria e Brendshme thekson se me veprime të tilla, punonjësit i janë paguar në mënyrë të paligjshme 1.159.081 denarë (18.837 euro), ndërsa buxheti i shtetit është dëmtuar me një shumë prej 27.347 eurosh.