Në mars do të ketë rritje të rrogave sipas ligjit, paralajmëroi ministri Durmishi

Nuk do të ketë rritje të shpejtë të pagës minimale nën presionin e sindikatave, dhe nuk do të ketë as shporta të shpenzimeve festive apo masa ad-hoc për stabilizimin e çmimeve dhe marzheve. Ministri i ekonomisë, Besar Durmishi, thotë se paga minimale do të rritet në mars vetëm sipas asaj që parashihet me ligj, në përputhje me formulën për llogaritje. Thekson se nuk do të ketë vendime populiste pasi ato do të rrisin inflacionin.

“Nëse i përgjigjemi presionit nga sindikatat, me atë vendim do të ushtrojmë presion mbi bizneset e vogla dhe të mesme, të cilat nuk do të kenë mjete financiare për të paguar punonjësit e tyre. Në disa raste, ata do të detyrohen të largojnë punonjës nga vendet e tyre të punës, gjë që do të ndikojë në inflacion për shkak të ciklit ekonomik”, tha Besar Durmishi.

Edhe pse inflacioni në tetor arriti 4,5%, ministri dhe kryeministri presin që ai të ulet deri në fund të vitit. Për momentin nuk do të ketë ndërhyrje në çmime.

“Për momentin nuk shoh arsye për të marrë vendim për ngrirje ose kufizim të marzhës bruto të fitimit në tregti të shumicës ose të pakicës me 10 për qind, siç e bëmë vitin e kaluar. Ne po analizojmë çmimet dhe tregun çdo ditë. Nëse ka nevojë, do të marrim vendim”, deklaroi Besar Durmishi.

Ndryshe, rroga mesatare mujore neto në Maqedoninë e Veriut është 45 310 denarë, ndërsa ajo bruto 68 180 denarë.