“Mos e blini atë mbeturinë, hidheni menjëherë”: Dr. Panovski paralajmëroi për mashtrim të rrezikshëm me imazhin e tij
“Mos e blini atë mbeturinë! Unë nuk kam reklamuar kurrë dhe as nuk do të reklamoj produkte”. Mikrobiologu Nikolla Panovski reagoi ashpër pasi interneti u vërshua përsëri me video dhe intervista të rreme në të cilat imazhi i tij po keqpërdoret për të shitur produkte të dyshimta, transmeton Portalb.mk.
Panovski lëshoi një paralajmërim dramatik për qytetarët, veçanërisht për të sëmurët kronikë. Gjëja më e rrezikshme, thotë ai, është se disa pacientë përdorin “ilaçe mrekullibërëse” të rreme si zëvendësim për terapinë e rregullt.
“Është e rrezikshme të ndërpritet terapia e rregullt e përshkruar nga mjekët dhe të zëvendësohet me produkte të tilla, veçanërisht kur bëhet fjalë për terapinë e diabetit”, thuhet në apelin e tij.
Mjeku këshillon këdo që ka rënë pre e mashtrimit dhe ka blerë një produkt të tillë ta hedhë menjëherë.
Vitin e kaluar, përhapësit e lajmeve të rreme për çajra dhe preparate të tjera të pavlera, të cilët keqpërdorën emrin e tij, fotot e çfarë jo, për t’u pasuruar personalisht duke mashtruar pacientët, janë dënuar me vendim të formës së prerë, njoftoi atëkohë mikrobiologu në faqen e tij në Facebook.
Ai tha se aktgjykimi për keqpërdorim të të dhënave personale për promovimin e çajrave “Parasol” dhe “Hipertea” është miratuar pas një viti e gjysmë.
Kompania importuese dhe distributore “MONAD PLUG Ltd. Shkup” është dënuar me 5000 euro gjobë, ndërsa personi përgjegjës Dejan Jovanovski është dënuar me 2100 euro, informoi Panovski.
Në rrjetet sociale shpesh keqpërdoren reklama false për disa preparate të ofruara nga mjekë fiktivë apo emra mjekësh eminentë. Mes të tjerëve në shënjestër ishte edhe Panovski, i cili padyshim nuk kishte asnjë lidhje me reklamimin e ndonjë ilaçi kundër parazitëve. Vetë ai deri më tani ka reaguar në Facebook në disa raste se emri i tij po keqpërdoret për reklama të rreme dhe u ka bërë thirrje qytetarëve që të kenë kujdes.