Mbrëmë u hap Festivali Olimpik Rinor Evropian Shkupi 2025, do të përfshijë gara në 15 disiplina sportive
Me paradën e 50 delegacioneve mbrëmë në Qendrën Sportive Jane Sandanski filloi Festivali Olimpik Rinor Evropian (EYOF) Shkupi 2025. Ceremonia shënoi fillimin e ngjarjes sportive shtatëditore që do të përfshijë gara në 15 disiplina sportive: atletikë, not, basketboll, basketboll 3×3, hendboll, volejboll, xhudo, gjimnastikë artistike, çiklizëm rrugor, çiklizëm malor, slalom me kajak, badminton, harkëtari, pingpong dhe taekwondo, transmeton Portalb.mk.
Garat do të zhvillohen në ambiente sportive me standarde ndërkombëtare në Shkup dhe Kumanovë, ndërsa garat e gjimnastikës artistike do të zhvillohen në Osijek të Kroacisë, në bashkëpunim me Komitetet Olimpike Evropiane dhe Kroate. Pritet të marrin pjesë mbi 4,000 atletë të rinj, trajnerë, zyrtarë sportivë dhe përfaqësues të ekipeve, si dhe qindra gazetarë, vullnetarë dhe të ftuar.
Maqedonia do të përfaqësohet këtë vit me një numër rekord atletësh që do të marrin pjesë në të gjitha sportet.
Presidentja Gordana Siljanovska-Davkova mbajti një fjalim në hapjen e EYOF dje, duke theksuar rëndësinë e sportit si simbol i unitetit, kulturës dhe shpresës.
“Sporti manifeston anën e bukur të së tashmes dhe garanton të ardhmen e ndritur të sportit evropian. Vazhdoni të zhvilloni frymën olimpike, të përhapni vullnetin e mirë dhe miqësinë dhe të dërgoni mesazhe paqeje”, tha presidentja.
Siljanovska-Davkova theksoi se festivali është një mundësi e rrallë për atletët e rinj dhe mysafirët që të njihen me kulturën maqedonase dhe shprehu besim se vendi do të dëshmojë se është një mikpritës human dhe i denjë, me një audiencë sportive të apasionuar. Ajo u uroi suksese të gjithë pjesëmarrësve në festivalin olimpik.
Sektori i Punëve të Brendshme Shkup njoftoi se për shkak të mbajtjes së Lojërave Evropiane Rinore Shkup 2025 në kajak në lumin Treska-Kanionin Matka, do të vendoset regjim i veçantë trafiku në atë pjesë të qytetit të Shkupit sot, nesër dhe të mërkurën nga ora 8:00 deri në orën 14:00, dhe të enjten nga ora 8:00 deri në orën 16:30.