Liqeni Treska dikur atraksion turistik, sot i mbytur nga plehrat

By F. I. On 24/05/2024 19:00

Objektet e shkatërruara rreth liqenit të Treskës; Foto: Meta.mk

“Liqeni i Treskës dikur ka qenë i stërmbushur nga vizitorë si të vendit po ashtu edhe të huaj ndërsa gjithçka që ka mbetur sot është kjo gjendje që po e shihni”, transmeton Alsat-M.

Ky vend turistik që dikur ka grumbulluar shumë njerëz, sot është lënë në harresë, ndërsa dy-tre vizitorët që sot ishin aty, kujtojnë kohën kur në një ditë janë shitur me dhjetëra mijëra bileta për të hyrë në këtë kompleks turistik. Ky liqe sipas të dhënave zyrtare e kishte kapacitetin për 10 mijë notues.

“Kur u lëshua kjo janë shitë 30 – 50 mijë bileta e sidomos në fundjavë… Komuna e Sarajit është e vetmja komunë që ka pasuri natyrore më të mirë nga gjitha komunat e Maqedonisë, parku i Sarajit, liqeni, Kanioni i Matkës, Rrahçën, nuk ka komunë si kjo dhe këtë ma ka thënë një ambasador i huaj por ja çfarë u bë”, u shpreh një qytetar.

“Kjo më herët ka qenë toka e jonë dhe e mori shteti e ja si u bë, më herët ishte shumë mirë, vinin turistë, pushonin njerëz dhe tani është kjo që është”, tha një tjetër qytetar.
“Shumë mirë ishte më herët dhe për të ardhur keq është se si është tani”, u shpreh një tjetër qytetar.

“Ka qenë pastër dhe tani e shoh që e paskan lenë pas dore shumë, atë që kanë rrënuar nga kampet, mbeturinat i kanë lenë dhe s’di sa kohë është ashtu por kjo është katastrofë”, nënvizoi një qytetar.

Liqeni i Treskës u ndërtua me vetë kontributin e banorëve të Shkupit në vitin 1978. Deri në vitin 1990 ky vend ishte atraksion për banorët e Shkupit. Në vitin 1998, për shkak të ndotjes së ujit, në liqen u ndalua larja dhe që prej asaj kohe filloi degradimi i tij. Në vitin 2013 liqeni i Treskës iu dorëzua komunës së Sarajit dhe deri tani të gjithë kryetarët e kësaj komune premtuan se këtë kompleks do ta vendosin përsëri në funksion, se do të ketë investime të mëdha, hotele, restorante, se këtij liqeni do ti ktheheni shkëlqimi i dikurshëm, por kjo nuk ndodhi kurrë.

Kryetarja e Shkupit, Danela Arsovska, në programin e saj parazgjedhor paralajmëroi pastrimin e deponive ilegale në 82 ditët e para të marrjes së detyrës në Qytetin e Shkupit. Më 26 janar 2022, autoritetet e qytetit njoftuan pastrimin e plotë të zonës përreth liqenit Tresca në një sipërfaqe prej 10,000 metrash katrorë.

Kryetarja Arsovska më pas premtoi kontrolle dhe inspektime të vazhdueshme që “do të vazhdojnë të jenë aktivitet i përditshëm i Qytetit të Shkupit” për të parandaluar sërish grumbullimin e mbeturinave në këtë lokacion, por është më se e qartë se kontrollet dhe inspektimet e tilla nuk kanë arritur të shpëtojnë lumin dhe liqeni Treska nga plehra.