Kuba pa naftë për tre muaj, miliona njerëz janë pa rrymë, Trump: Do të isha i nderuar të merrja drejtimin e vendit

Miliona njerëz në Kubë mbetën pa energji elektrike pas shembjes së rrjetit kombëtar. Kjo ishte e fundit në një seri ndërprerjesh të gjera të energjisë që kanë goditur vendin, i cili po përballet me mungesa kronike të karburantit për shkak të bllokadës amerikane të furnizimit me naftë, transmeton Portalb.mk.

Operatori i rrjetit të Kubës, UNE, tha se po rikthente gradualisht energjinë në provinca dhe qytete në të gjithë vendin.

Kuba është shumë e varur nga nafta e importuar, ndërsa Venezuela më parë i dërgonte asaj 35,000 fuçi naftë në ditë, rreth gjysma e nevojave të vendit. Megjithatë, këto furnizime u shteruan pasi SHBA-të morën peng presidentin Venezuelian Nicolas Maduro në fillim të janarit, duke përkeqësuar më tej krizën energjitike të Kubës.

Sipas presidentit Miguel Diaz-Canel, asnjë dërgesë nafte nuk ka mbërritur në Kubë në tre muajt e fundit.

Trump u tha gazetarëve në Shtëpinë e Bardhë të martën se do të ishte i nderuar të pushtonte Kubën.

“Pavarësisht nëse e çliroj apo e marr në kontroll, mund të bëj çfarë të dua me të. Ata janë një komb shumë i dobësuar tani”, tha Trump, i cili më parë ka kërcënuar me një “marrje miqësore” të Kubës, një armik i Shteteve të Bashkuara që nga revolucioni i vitit 1959.

Javën e kaluar, Diaz-Canel konfirmoi se qeveria e tij ishte në fazat e hershme të bisedimeve me administratën Trump për të zgjidhur mosmarrëveshjet e tyre.