KSHZ: Filloi mbledhja e nënshkrimeve për kandidatët e pavarur për kryetar komune në Gostivar dhe tre komunat tjera
Procedura për mbledhjen e nënshkrimeve për kandidatët e pavarur për kryetar komune filloi sot në katër komunat ku nuk u arrit censusi në zgjedhjet e fundit lokale, njoftoi Komisioni Shtetëror i Zgjedhjeve (KSHZ). Këto janë komunat Gostivar, Vrapçisht, Mavrovë dhe Rostushë dhe Qendër Zhupë, transmeton Portalb.mk.
Procedura për mbështetjen e kandidaturave të pavarura do të zhvillohet para zyrtarëve të departamenteve dhe zyrave rajonale kompetente të KSHZ-së, si dhe para një noteri kompetent.
Mbledhja e nënshkrimeve do të zhvillohet çdo ditë pune gjatë orarit të rregullt të punës, nga ora 8:30 deri në orën 16:30.
Afati i fundit për mbledhjen e nënshkrimeve është 30 nëntori në mesnatë.
KSHZ thotë se departamenti i tyre rajonal në Gostivar është përgjegjës për mbledhjen e nënshkrimeve për kryetar komune të komunave Gostivar, Mavrovë dhe Rostushë dhe Vrapçisht.
Zyra e KSHZ-së në Dibër është përgjegjëse për Komunën Qendër Zhupë.
Zgjedhjet e përsëritura për kryetar komune në këto katër komuna po mbahen për shkak se pragu ligjor nuk u arrit në zgjedhjet lokale të 19 tetorit, prandaj nuk u zgjodhën kryetarë komune.
Në Gostivar, pjesëmarrja ishte 33.31 përqind, në Vrapçisht – 25.18 përqind, në Mavrovë dhe Rostushë – 30.31 përqind dhe në Qendër Zhupë – 21.49 përqind.
Sipas kodit zgjedhor, që zgjedhjet të jenë të suksesshme, duhet të dalin të paktën një e treta e votuesve ose 33.33 përqind.
Zgjedhjet e përsëritura janë caktuar për 11 janar 2026.
Kryetari aktual në detyrë i Komunës së Gostivarit dhe kandidat nga zgjedhjet e fundit lokale, Valbon Limani, konfirmoi se do të rihyjë në garë për postin e kryetarit të komunës.
Në votimin paraprak, Limani ishte kandidat i koalicionit “Aleanca Kombëtare për Integrim” (AKI). Ai fitoi 61.39 përqind, ose 16,949 vota.