Janevska: Dhuna nuk fillon në shkollë, por më shpesh në familje

By N. D. On 16/06/2026 12:33

Foto nga Mikhail Nilov: https://www.pexels.com/photo/sad-boy-in-gray-sweater-sitting-on-the-floor-7929419/

Pesë ministri, së bashku me institucione partnere, organizata joqeveritare dhe anëtarë të Grupit kombëtar të punës për parandalimin e dhunës tek të rinjtë, nënshkruan sot një Deklaratë për qëllime duke u zotuar për bashkëpunim më intensiv në adresimin e kësaj sfide serioze shoqërore, transmeton Portalb.mk.

Dokumenti u nënshkrua nga Ministria e Arsimit dhe Shkencës, Ministria e Sportit, Ministria e Punëve të Brendshme, Ministria e Politikës Sociale, Demografisë dhe Rinisë dhe Ministria e Transformimit Digjital, ndërsa procesi zbatohet me mbështetjen e OSBE-së.

Nënshkruesit u zotuan për krijimin e një mjedisi shkollor më të sigurt, edukimin për komunikim jo të dhunshëm, parandalimin e dhunës në sport, forcimin e sigurisë digjitale, promovimin e shëndetit mendor dhe mbështetjes psikosociale, si dhe koordinim dhe llogaridhënie më të mirë midis institucioneve.

Ministrja e Arsimit dhe Shkencës, Vesna Janevska, theksoi se dhuna tek të rinjtë është një fenomen që nuk mund të zhduket plotësisht, por mund të reduktohet ndjeshëm përmes masave në kohë dhe të koordinuara.

“Kemi bërë ndryshime ligjore që i detyrojnë shkollat të planifikojnë aktivitete për të promovuar mirëqenien e nxënësve, mbrojtjen nga dhuna dhe diskriminimi, si dhe për të përmirësuar komunikimin dhe respektin e ndërsjellë. Kemi forcuar shërbimet profesionale dhe kemi rivendosur detyrat e gatishmërisë së mësuesve gjatë festave”, tha Janevska.

Ajo kujtoi se janë hartuar manuale për t’u marrë me dhunën nga bashkëmoshatarët dhe dhunën kibernetike, bazuar në shembuj praktikë dhe zgjidhje efektive.

“Të rinjtë nuk bëhen agresivë në shkollë, por më shpesh sjellin agresion nga familja. Ndryshimet legjislative që parashikojnë gjoba për prindërit dhe kujdestarët e fëmijëve që zbulohen se përfshihen në dhunë nga bashkëmoshatarët janë në procedurë parlamentare”, vuri në dukje ministrja.

Janevska njoftoi se një fushatë shumësektoriale që synon parandalimin dhe trajtimin e dhunës në familje dhe dhunës nga bashkëmoshatarët do të nisë në periudhën e ardhshme.

Kujtojmë se në prill të këtij viti, ministrja, Vesna Janevska, bën thirrje për mbështetje nga prindërit, pasi thotë se institucionet nuk mund të përballen të vetme me këto dukuri.

Së fundmi janë regjistruar disa raste të dhunës midis të rinjve dhe nxënësve në shkollat e vendit. Ndër rastet e fundit të dhunës mes bashkëmoshatarëve është edhe ai në Gjorçe Petrov, ku u raportua se një grup prej katër vajzash keqtrajtonin një vajzë 13-vjeçare, duke e djegur me cigare dhe duke e detyruar të hajë jashtëqitje qeni, ndërsa gjithçka e incizonin me telefon celular. Edhe kundër prindërve të tyre janë ngritur kallëzime penale.

Pas kësaj, para shkollës “Stiv Naumov” në Manastir patrullonte policia pasi prindërit e nxënësve të klasës së shtatë dërguan ankesë në Inspektoratin Shtetëror të Arsimit, se një bashkëmoshatar kishte kërcënuar në TikTok me likuidim të nxënësve.

Së fundmi, në një shkollë në lagjen Hasanbeg të Shkupit, një ish-nxënës theri me thikë një nxënës të klasës së nëntë, i cili për shkak të lëndimeve u shtrua në kujdes intensiv në Qendrën Klinike.