ISHP: Gjatë pushimeve, hani ushqim të freskët dhe parandaloni pickimet nga insektet

Instituti i Shëndetit Publik ka publikuar rekomandime për mbrojtjen nga sëmundjet gjatë udhëtimit. Ata deklarojnë se, nëse udhëtarët bien në grupin e personave me sëmundje kronike (sëmundje të sistemit të frymëmarrjes, zemrës, mëlçisë, veshkave, diabetit, imunitetit të zvogëluar nga çdo sëmundje), duhet të kërkojnë këshilla nga mjeku amë ose specialist, i cili do të vlerësojë rrezikun e udhëtimit, transmeton Portalb.mk.  

“Gjatë udhëtimit, konsumoni ushqim të sigurt dhe ujë të pijshëm. Hani vetëm ushqim që është gatuar mirë dhe shërbehet menjëherë (i nxehtë). Hani fruta dhe perime që i keni larë me ujë të sigurt ose i keni qëruar vetë, pini ujë ose pije të gazuara që janë në shishe dhe të mbyllura ose kafe ose çaj shumë të nxehtë. Përdorni akull të bërë nga uji i shishezuar ose i dezinfektuar. Lani duart shpesh dhe për një kohë të gjatë me sapun dhe ujë. Ushqimet ose pijet e kontaminuara mund të shkaktojnë diarre dhe sëmundje të tjera të zorrëve. Diarreja e udhëtarit është sëmundja më e zakonshme që shoqërohet me udhëtimin”, paralajmërojnë ata. 

Në rekomandimet gjithashtu theksohet se si të parandalohen pickimet nga insektet. 

“Përdorimi i repelentëve mund t’ju mbrojë nga sëmundjet serioze që përhapen përmes pickimeve të mushkonjave, siç janë ethet e Nilit Perëndimor, Zika, denguja, ethet e verdha dhe malaria. Nëse udhëtoni në zona malore, qëndroni në pyje ose zona me bar, mbrojeni veten nga pickimet e rriqrave që mund të transmetojnë sëmundje serioze. Aplikoni fillimisht kremin mbrojtës nga dielli, pastaj repelentin. Ndiqni udhëzimet në etiketë. Shkarkoni një fletushkë me informacion mbi këshilla praktike për mbrojtjen e udhëtarëve nga pickimet e mushkonjave, si dhe nga rriqrat, në lidhjet e mëposhtme”, thonë nga ISHP.