Është koha që të ndalojmë ndërhyrjen në gjyqësor, tha Gashi për rastin Grubi
Është koha e duhur që të ndalojmë së ndërhyri në gjyqësor – tha kryetari i Kuvendit, Afrim Gashi, kur iu kërkua të komentonte kthimin e ish-zëvendëskryeministrit Artan Grubi në vend, i cili kishte qenë në arrati për më shumë se një vit, dhe u kthye në vend të hënën. Lidhur me këtë, Gashi tha se nuk është mirë për Kuvendin dhe për të personalisht si kryetar i Dhomës Legjislative të komentojë vendimet politike, transmeton Portalb.mk.
“Megjithatë, ajo që kam deklaruar publikisht dhe mund ta përsëris është se është koha e duhur që të ndalojmë së ndërhyri në gjyqësor. Ky perceptim tek qytetarët se ekziston një lloj marrëveshjeje lë një ndjesi të keqe tek të gjithë qytetarët, kështu që mesazhi im do të ishte që më në fund çdo institucion duhet të bëjë punën e vet, në këtë pjesë është gjyqësori dhe prokuroria. Le ta bëjnë punën e tyre me ndërgjegje dhe profesionalizëm. Kjo do të jetë e mjaftueshme që të gjithë qytetarët të jenë të kënaqur. Në fund të fundit, drejtësia është e rëndësishme”, tha Gashi në një deklaratë për mediat.
Kryetari i Parlamentit u bëri thirrje të gjitha institucioneve dhe aktorëve në shoqëri – gjyqësorit, prokurorisë, ekzekutivit dhe legjislativit – të kryejnë punën e tyre profesionalisht dhe me ndërgjegje.
“Nëse të gjithë punojmë në një drejtim, mendoj se do të arrijmë efekte pozitive në një kohë më të shpejtë”, tha Gashi, duke shtuar se nuk ka më kohë për të humbur në krijimin e një shteti ligjor.
Kryetari i Parlamentit nuk beson se kthimi i Artan Grubit është vendim politik.
“Nuk kam informacion, nuk mund të pohoj diçka që nuk e di”, tha ai.
Më 23 shkurt, në orët e para të mëngjesit u arrestua ish-zëvendëskryeministri i Maqedonisë së Veriut, Artan Grubi. Ai u arrestua në kalimin kufitar ndërmjet Kosovës dhe Maqedonisë së Veriut, prej nga edhe ishte larguar. Pasi u dërgua në burgun e Shutkës, vazhdoi intervistimin në Prokurori dhe Gjykatën Penale.
Pas intervistës së zhvilluar ndërmjet prokurorit publik dhe Artan Grubit rreth aferës korruptive në “Lotarinë Shtetërore”, prokurori publik kërkoi ndryshimin e masës së sigurisë për të dyshuarin e dytë, Artan Grubin. Gjykata Themelore Penale në Shkup e pranoi propozimin. Pas reagimeve në opinion, Prokuroria sot u arsyetua se vendimi është bazuar në informacione nga MPB dhe Agjencia e Sigurisë Kombëtare se siguria e tij nuk mund të garantohet në paraburgim.
Artan Grubi në fund të vitit 2024 u fut në Listën e Zezë Amerikane për korrupsion dhe ndërhyrje në proceset gjyqësore për të shpëtuar Sasho Mijallkovin, pas së cilës ai u tërhoq nga jeta publike.
Pak ditë më vonë, ai u arratis nga vendi, ndërsa kërkohej me fletarrest ndërkombëtar së bashku me ish drejtorin e Lotarisë Shtetërore Përparim Bajramin, për rastin ‘Lotaria’. Atyre u është caktuar masa e paraburgimit për 30 ditë.
Që të dy dyshohen se kanë dëmtuar buxhetin e shtetit në vlerë prej mbi 8.2 milion euro. Ata ngarkohen për veprën penale “mashtrim në shërbim” sipas nenit 354 të Kodit Penal, që parashikon dënim me të paktën katër vjet burg.
Katër të tjerët dyshohen në cilësinë e tyre si kryetarë dhe anëtarë të një komisioni për dy thirrje të veçanta publike dhe ekziston dyshimi se kanë abuzuar me kompetencat dhe detyrat e tyre të veçanta dhe kanë kryer thirrje publike për transferimin e të drejtës për të organizuar lojëra fati elektronike dhe online, megjithëse e dinin se një procedurë e tillë në raste specifike nuk duhet të kryhet.