Ermonela Jaho u dekorua nga Franca me titullin prestigjioz “Chevalier des Arts et des Lettres”
Sopranoja shqiptare me famë botërore, Ermonela Jaho, është nderuar nga Franca me titullin prestigjioz “Chevalier des Arts et des Lettres”, një nga dekoratat më të rëndësishme që ndahet për personalitete me kontribut të jashtëzakonshëm në fushën e artit dhe kulturës, shkruan Portalb.mk.
Ky vlerësim i lartë vjen si dëshmi e karrierës së saj të jashtëzakonshme artistike dhe ndikimit të madh që Jaho ka pasur në skenat më të njohura operistike botërore, duke e bërë emrin e saj një nga më të respektuarit në muzikën klasike ndërkombëtare.
Në mesazhin e saj emocionues pas marrjes së këtij titulli, artistja në profilin e saj në Facebook është shprehur:
“Marrja sot e titullit ‘Chevalier des Arts et des Lettres’ është për mua një emocion i jashtëzakonshëm dhe një nder shumë i çmuar për zemrën time, pasi Franca përfaqëson për mua dashurinë për artin, kulturën dhe të vërtetën njerëzore. Dëshiroj të shpreh mirënjohjen time më të sinqertë për të gjithë njerëzit që kanë shoqëruar rrugëtimin tim, veçanërisht për Dominique Riber, agjentin tim besnik prej shumë vitesh, për besimin dhe mbështetjen e vazhdueshme, si dhe për Jean-Philippe Thiellay, pasioni i sinqertë i të cilit për operën dhe përkushtimi bujar e bënë të mundur këtë moment kaq të çmuar. Nuk mund ta imagjinoja një ambient më të bukur për këtë ceremoni sesa i rrethuar nga miq të sinqertë, dashamirës të artit dhe një publik që i dha kuptim të gjitha sakrificave të jetës së një artisti.
E pranoj këtë vlerësim me përulësi, mirënjohje dhe emocion të thellë. Faleminderit Francë që e prite zërin dhe zemrën time me kaq bujari”, ka shkruar Jaho.
Ermonela Jaho sot nuk është vetëm një zë i madh i operës botërore; ajo është dëshmi se talenti shqiptar mund të ngjitet në majat më të larta të artit ndërkombëtar dhe të nderohet nga shtetet që kulturën e kanë në themel të identitetit të tyre.
Titulli “Chevalier des Arts et des Lettres” nuk është vetëm një dekoratë për një artiste të jashtëzakonshme, por edhe një moment krenarie për çdo shqiptar që e sheh emrin e saj duke shkëlqyer në skenat më prestigjioze të botës.
Nga Shqipëria në Paris, Londër, Milano e New York, Ermonela Jaho ka dëshmuar se arti i madh nuk njeh kufij. Zëri i saj nuk ka pushtuar vetëm skenat, por edhe zemrat e publikut botëror. Ky nderim nga Franca është vulë e një karriere të ndërtuar me sakrificë, pasion dhe madhështi artistike.