Durmishi: Për momentin nuk ka nevojë për masa për çmimet e ushqimeve, nëse ka rritje të madhe do të reagojmë
Ministria e Ekonomisë dhe Punës aktualisht nuk po planifikon të prezantojë masa të reja kufizuese ose kufizime mbi kufijtë e fitimit bruto ose çmimet e produkteve ushqimore. Sipas ministrit Besar Durmishi, situata e tregut është e qëndrueshme dhe të dhënat zyrtare tregojnë rënie të lehtë të kostos së jetesës në sektorin ushqimor, transmeton Portalb.mk.
Ai theksoi se të dhënat e fundit nga Enti Shtetëror i Statistikave (ESHS) tregojnë se në dhjetor të vitit të kaluar, çmimet e ushqimit dhe pijeve ranë me 0.4 përqind.
“Për momentin, nuk shohim asnjë arsye për të vendosur ndonjë kufizim mbi kufijtë e fitimit bruto ose kufijtë e çmimeve. Ne po e monitorojmë situatën çdo ditë në komunikim me Inspektoratin Shtetëror të Tregut (ISHT) dhe nëse ka rritje të madhe, ne jemi gati të reagojmë”, tha Durmishi në përgjigje të pyetjeve gazetareske.
Durmisih tha se vitin e kaluar, Inspektorati Shtetëror i Tregut (ISHT) kreu mbi 20,000 inspektime dhe vendosi gjoba me një total prej 2.5 milionë eurosh.
Ministri tha se tregtarët që përfitonin në kurriz të qytetarëve pa justifikim ekonomik u sanksionuan dhe njoftoi se ka kontrolle të rregullta dhe se rritjet e pajustifikuara të çmimeve nuk do të tolerohen më.
“Nëse ka rritje të madhe të çmimeve siç ishte më parë, ne jemi këtu, do të reagojmë dhe do të marrim masa siç ishte më parë”, shtoi ai.
Raporti i fundit nga Enti Shtetëror i Statistikave (ESHS) tregon se indeksi i kostos së jetesës në dhjetor të vitit të kaluar shënoi një rritje vjetore prej 4.1 përqind krahasuar me të njëjtin muaj të vitit të kaluar, ndërsa në të njëjtën kohë, indeksi i çmimeve me pakicë u rrit me 3.7 përqind.
Inflacioni, i matur përmes indeksit të kostos së jetesës, u rrit me 0.4 përqind në dhjetor të vitit të kaluar krahasuar me muajin e kaluar.
Sipas të dhënave nga ESHS, rritja e kostos së jetesës është rezultat i çmimeve më të larta në disa sektorë. Rritja më e rëndësishme në dhjetor krahasuar me muajin e kaluar u regjistrua në grupin e transportit, ku pati një rritje prej 5.8 përqind.
Në dhjetor të vitit të kaluar, krahasuar me muajin paraprak, u regjistrua rënie e kostos së jetesës në ushqim dhe pije joalkoolike me 0.4 përqind dhe në veshmbathje dhe këpucë me 0.2 përqind.
Në dhjetor të vitit të kaluar, kryeministri Hristijan Mickoski tha se nuk ishte planifikuar të futeshin masa, por njoftoi se inspektorët nga Inspektorati Shtetëror, së bashku me Komisionin për Mbrojtjen e Konkurrencës (KMK), kishin dalë në terren për inspektim të detajuar të tregjeve dhe se qëllimi ishte të përcaktohej nëse kishte lidhje karteli dhe fiksim kontraktual të çmimeve midis zinxhirëve të shitjes me pakicë.