Bytyqi: Në pakon e re të masave antikrizë do të përfshihen edhe pensionistët

By N. D. On 27/10/2023 11:35

Fatmir Bytyqi, zëvendëskryeministër për Çështje Ekonomike. Foto: Qeveria e RMV-së

Pensionistët do të përfshihen në pakon e re të masave kundër krizës, ashtu siç u përfshinë vitin e kaluar dhe në fillim të këtij viti përmes pakos së energjisë që iu ofrua. Kështu deklaroi zëvendëskryeministri përgjegjës për çështje ekonomike Fatmir Bytyqi, gjatë paraqitjes së tij në “Vetëm intervistë”, që transmetohet në televizionin Kanal 5, transmeton Portalb.mk.

Bytyqi krahas njoftimit për pakon e masave kundër krizës që do t’u ofrohet pensionistëve, iu referua edhe caktimi të pensionit minimal, i cili duhet të përcaktohet me ligj, sepse Qeveria kërkon zgjidhje sistematike të problemeve.

“Ne kemi një ligj me të cilin rregullojmë pensionet dy herë në vit, me një metodologji të caktuar që është e përshtatshme dhe jep rezultate. Gjithashtu, me miratimin e ligjit të ri për pensionin minimal do të përmbyllim të gjithë procesin e reformës dhe do të lëmë anash problemin e pensionistëve. Me këtë Qeveria e ardhshme nuk do të merret me këtë problem”, tha zëvendëskryeministri Bytyqi, ndërsa shtoi se ka gjëra më të bukura për njerëzit në moshën e duhur, për të cilat do të duhet të flitet, siç është kujdesi për ata ose përkujdesja në shtëpi.

Sa i përket çështjes së definimit ligjor të pensionit minimal, grupi punues do të vazhdojë të punojë në gjetjen e një zgjidhje të re ligjore për pension minimal, me ndryshime të ligjit aktual apo ligj të ri të posaçëm, me çka grupi punues duhet të japë draft propozim të parë deri në dhjetor 2023.

Pensionistët protestojnë prej në shtator, ndërkaq në Maqedoninë e Veriut jetojnë rreth 330.000 pensionistë, shumica prej tyre, mbi 97.000, kanë pensione deri në 13.000 denarë.