Bisedimet për paqe në Gaza, Trump ndërmjetësve: Veproni shpejt ose do të ketë gjakderdhje

Presidenti i SHBA-së, Donald Trump, u ka kërkuar të gjitha palëve të përfshira në përpjekjet për t’i dhënë fund luftës në Gaza të veprojnë shpejt, pasi ndërmjetësit do të takohen sot në Egjipt për bisedime indirekte paqeje midis Hamasit dhe Izraelit, raporton BBC.

Bisedimet vijnë pasi Hamasi ra dakord për disa pjesë të planit të paqes prej 20 pikash të SHBA-së, duke përfshirë lirimin e pengjeve dhe dorëzimin e qeverisjes së Gazës tek teknokratët palestinezë, por kërkon negociata për çështje të tjera.

Duke shkruar në mediat sociale se bisedimet kishin qenë shumë të suksesshme, Trump tha: “Më është thënë se faza e parë duhet të përfundojë këtë javë dhe po u kërkoj të gjithëve të veprojnë shpejt. Koha është thelbësore ose do të ketë gjakderdhje masive.”

Duke folur me gazetarët paraprakisht, Trump tha se besonte që pengjet do të fillonin të liroheshin shumë shpejt.

Kur u pyet për fleksibilitetin në planin e tij të paqes, Trump tha se nuk kishte nevojë për fleksibilitet sepse të gjithë ranë dakord për të, por gjithmonë do të ketë disa ndryshime.

“Kjo është një marrëveshje e shkëlqyer për Izraelin, një marrëveshje e shkëlqyer për të gjithë botën arabe, botën myslimane dhe botën, kështu që jemi shumë të lumtur për këtë”, shtoi ai.

Ndërkohë, sulmet ajrore izraelite vazhduan në Gaza, pavarësisht se Trump i tha Izraelit të ndalonte menjëherë bombardimet të premten pasi Hamasi iu përgjigj planit të propozuar.

Zëdhënësi i qeverisë izraelite, Shosh Bedrosian, u tha gazetarëve të dielën se ndërsa disa bombardime ishin ndalur në Rripin e Gazës, nuk kishte armëpushim në këtë kohë.

Raportet nga Gaza thanë se Izraeli vazhdoi sulmet ajrore dhe zjarret me tanke gjatë natës dhe të dielën, duke shkatërruar dhjetëra ndërtesa banimi në Qytetin e Gazës.

65 persona të tjerë u vranë në operacionet ushtarake izraelite, tha Ministria e Shëndetësisë e Gazës.

Sekretari i Shtetit i SHBA-së, Marco Rubio, i tha CBS News, se bombardimet duhej të ndaleshin për të lehtësuar lirimin e pengjeve.

“Nuk mund të lirosh pengje ndërsa ende ka bombardime, kjo duhet të ndalet, por duhet të punosh edhe në logjistikën tjetër”, tha ai për emisionin “Face the Nation” të CBS News të dielën.

Plani 20-pikësh propozon një ndërprerje të menjëhershme të luftimeve dhe lirimin e 48 pengjeve, nga të cilët besohet se vetëm 20 janë gjallë, në këmbim të qindra banorëve të Gazës që mbahen në burgjet izraelite.

Netanyahu në një fjalim televiziv të shtunën tha se shpresonte të njoftonte lirimin e pengjeve në ditët në vijim.