ANALIZË:Borxhet e shtetit tejkaluan 700 milionë euro, borxhet më të mëdha i kanë ndërmarrjet publike dhe kompanitë shtetërore

Rritje e re e borxhit “të brendshëm” në fund të shtatorit të këtij viti, detyrimet e prapambetura dhe të papaguara të shtetit, në nivel lokal dhe qendror dhe në të gjithë sektorët, tejkaluan 700.000.000 euro. Pjesa më e madhe e borxhit, ose më shumë se 281.000.000 euro, u takon ndërmarrjeve publike dhe kompanive në pronësi shtetërore. Analiza krahasuese e “Portalb”-it, e bazuar në të dhënat e Ministrisë së Financave, tregon se borxhi është rritur si në krahasim me muajin qershor (tremujorin e dytë), ashtu edhe në krahasim me fundin e dhjetorit të vitit të kaluar, shkruan analiza ekonomike javore e Portalb.mk.

Borxhi është rritur si në krahasim me vitin e kaluar, ashtu edhe në krahasim me tremujorin e dytë, rritje e detyrimeve te komunat, ndërmarrjet publike, sektori i shëndetësisë

Vetëm për nëntë muaj, në shtator, krahasuar me fundin e dhjetorit të vitit të kaluar, borxhi i brendshëm, përkatësisht detyrimet e prapambetura dhe të papaguara të shtetit, si në nivel qendror ashtu edhe në atë lokal, janë rritur për gati 46.000.000 euro – tregon përllogaritja e Portalb.mk, e bërë në bazë të të dhënave të reja nga Ministria e Financave.

Sipas të dhënave nga “lista e re e borxhlinjve”, detyrimet e përgjithshme të prapambetura dhe të papaguara në fund të tremujorit të tretë arritën në gati 712.000.000 euro – niveli më i lartë deri më tani. Borxhi është rritur edhe në baza tremujore, për gati 20.000.000 euro krahasuar me qershorin e këtij viti, kur arrinte në pak më shumë se 692.500.000 euro.

Infografik: Fisnik Xhelili/Portalb.mk
Infografik: Fisnik Xhelili/Portalb.mk

Për të përcaktuar trendin e lëvizjes së shumave të detyrimeve të prapambetura dhe të papaguara të shtetit, Portalb.mk bëri një krahasim të gjendjes në grupet kryesore të subjekteve, si në baza tremujore, ashtu edhe në raport me fundin e dhjetorit të vitit 2025.

Pjesa më e madhe e borxhit u takon ndërmarrjeve publike dhe kompanive shtetërore, detyrimet e prapambetura dhe të papaguara të të cilave në fund të shtatorit tejkaluan 281.000.000 euro, me një rritje prej 7.000.000 eurosh në krahasim me dhjetorin e vitit të kaluar dhe prej 10.400.000 eurosh në krahasim me qershorin e këtij viti.

Rritje më e madhe e borxheve është shënuar në shëndetësinë publike në fund të shtatorit, detyrimet e papaguara dhe të papaguara arritën në gati 157.000.000 euro dhe, në krahasim me dhjetorin e vitit të kaluar, u rritën për madje 54.000.000 euro.

Borxhet e institucioneve shëndetësore publike janë rritur edhe në krahasim me qershorin e këtij viti, për 23.000.000 euro. Rriten edhe detyrimet e papaguara të komunave, të cilat në fund të tremujorit të tretë tejkaluan shumën prej 93.350.000 eurosh, me një rritje prej 252.000 eurosh në krahasim me qershorin e këtij viti dhe prej 3.000.000 eurosh në krahasim me dhjetorin e vitit të kaluar.

Infografik: Fisnik Xhelili/Portalb.mk
Infografik: Fisnik Xhelili/Portalb.mk

Ndryshe është gjendja me detyrimet e prapambetura dhe të papaguara të ndërmarrjeve publike komunale, të cilat në fund të shtatorit arritën në mbi 105.000.000 euro, por me trend të uljes krahasuar me qershorin e këtij viti dhe me fundin e dhjetorit të vitit 2025.

Përdoruesit buxhetorë të linjës së parë (ministritë, agjencitë dhe institucionet e linjës së parë), në fund të shtatorit të këtij viti raportuan detyrime të prapambetura dhe të papaguara në vlerë prej 21.000.000 eurosh, me trend të uljes krahasuar me qershorin dhe me dhjetorin e vitit të kaluar.

Pjesa më e madhe e detyrimeve të prapambetura dhe të papaguara, në vlerë prej gati 350.000.000 eurosh, janë ndaj sektorit publik, përkatësisht janë borxhe “ndërsektoriale”. Detyrimet ndaj sektorit privat, shoqatave të qytetarëve dhe organizatave të tjera jofitimprurëse tejkaluan 331.000.000 euro, ndërsa borxhet ndaj subjekteve jashtë vendit tejkaluan 33.000.000 euro.

Infografik: Fisnik Xhelili/Portalb.mk
Infografik: Fisnik Xhelili/Portalb.mk

Në listën e re të borxhlinjve figurojnë 879 institucione, komuna, ministri, agjenci, kompani shtetërore, shkolla, institucione shëndetësore publike, gjykata, qendra për punë sociale dhe fonde, të cilat kanë raportuar se kanë detyrime të prapambetura dhe të papaguara.