11 shtetas nga Maqedonia e Veriut presin evakuim nga Izraeli
Ministria e Punëve të Jashtme e Maqedonisë së Veriut ka bërë të ditur se 11 shtetas të vendit presin evakuim nga Izraeli, transmeton Portalb.mk.Ministria informoi se pas rimbylljes së sotme të hapësirës ajrore izraelite dhe të Aeroportit Ben Gurion në Tel Aviv, të gjitha fluturimet për në dhe nga Izraeli janë anuluar dhe se fluturimet pritet të rifillojnë gjatë ditës, varësisht nga situata e sigurisë, transmeton Portalb.mk.
“Sipas informacionit të marrë nga Ambasada e Republikës së Maqedonisë së Veriut në Tel Aviv, gjithsej 11 shtetas maqedonas aktualisht presin evakuim me fluturim nga Tel Avivi. Mund të zbatohet në ditët në vijim, varësisht nga zhvillimi i situatës së sigurisë. Si alternativë, ekziston mundësia e evakuimit në rrugë detare – me anije nga Ashdodi në Limasol (Qipro), për të cilën Ambasada është në komunikim të rregullt me qytetarët maqedonas dhe autoritetet kompetente izraelite”, thanë nga Ministria e Jashtme.
Përveç evakuimit të grupit të parë të qytetarëve të kryer me aeroplan qeveritar më 17 qershor, që nga 22 qershori, numri i përgjithshëm i qytetarëve të Maqedonisë së Veriut të interesuar për evakuim nga Izraeli është 27.
“Megjithatë, jo të gjithë janë të gatshëm ta bëjnë këtë menjëherë”, thanë nga MPJ.Qytetarët mund të kontaktojnë në numrat : +389 75 273 732 dhe +389 75 268 736
Ose linjat telefonike të Ambasadës në Tel Aviv: +972 54 500 8566 dhe +972 54 967 054
MPJ u bëri thirrje të gjithë qytetarëve të përmbahen nga udhëtimet në vendet e Lindjes së Mesme ku situata e sigurisë është përkeqësuar seriozisht.