Dëshmitari i parë i prokurorisë në rastin Koçani: Të lutem shpëtoji ata, bërtiste djali im ndërsa tymi i dendur dilte nga Pulse

By N. D. On 25/12/2025 15:25

Gjykimi për zjarrin në Koçan. Foto printscreen

Dejan Nikollov, pronari i një stacioni servisi makinash në afërsi të Pulse, ishte dëshmitari i parë i Prokurorisë i cili, në seancën e sotme, përshkroi në detaje se çfarë ndodhi natën kur i ashtuquajturi kabare u përfshi nga flakët dhe si ndihmoi në shpëtimin e mysafirëve në objekt. Ai, së bashku me djalin dhe miqtë e tij, ishin mysafirë në Pulse atë natë, transmeton Portalb.mk.

Duke iu përgjigjur pyetjeve të prokurorit Vlladimir Milloshevski, dëshmitari tha se ai dhe miqtë e tij kishin qenë më parë në një kafene në qendrën tregtare në Koçan, dhe rreth orës 1:30 të mëngjesit shkuan në Pulse. Pasi hynë, shkuan në një nga dy baret, nga ku i dërgoi një mesazh djalit të tij, i cili ishte tashmë atje.

“Atje ishte Deko, Dejan Jovanov (i pandehuri i parë, pronar i Pulse). Ai u habit kur më pa sepse nuk kisha qenë në diskotekë për një kohë të gjatë. Nuk kaluan pak minuta, fëmija (djali i tij) erdhi dhe më tha se ku ishte me miqtë e tij. I thashë të shkonte atje, dhe se ai do të qëndronte në banak”, tha Nikollov.

Me kërkesën e mikut të tij, ata vendosën të shkonin për një cigare, jashtë klubit, te biletaria. Erdhi edhe djali i tij, i cili dëshironte ta prezantonte me të dashurën. Disa nga miqtë e djalit të tij ishin tashmë jashtë. Ndërsa ishin atje duke bërë shaka, në një moment një nga miqtë e djalit të tij doli, tregoi një video të regjistruar dhe tha: “Diskoja po digjet.” Pastaj filluan të dilnin më shumë njerëz dhe filluan të dëgjoheshin zëra të çuditshëm nga brenda. Nikollov tha se fëmijët ishin shumë të shqetësuar dhe i mori me vete në objektin e tij. Kishte 15 deri në 20 fëmijë.

“Pashë tym dhe dëgjova zëra të çuditshëm që vinin nga brenda. Fëmijët ishin të shqetësuar, vura re se u ndërpre energjia elektrike dhe pastaj pati ulërima të forta dhe pastaj tym filloi të dilte nga pjesa e përparme e ndërtesës. Dhe vura re se tym i zi po dilte nga pjesa e pasme e tualetit të grave”, tha ai.

Kishte hekura në dritaren e tualetit, dhe atëherë ai dëgjoi zëra nga tualeti i grave. Ai tha se ata thyen dritaret dhe panë vajza që mbanin njëra-tjetrën duke qarë mbi hekura, disa prej tyre duke tundur telefonat celularë me dritat ndezur.

“U përpoqa t’i qetësoja. U thashë se zjarrfikësit do të vinin së shpejti. Djali im ishte me mua, duke bërtitur: Babi, të lutem shpëtojini. Vajzat po thoshin: ‘Xhaxha, na spërkat, sepse kështu më lehtë marrim frymë.’ Dëgjova nënën time duke folur me njërën nga vajzat”, tha Nikollov.

Zjarrfikësit tha se mbërritën shumë shpejt dhe ai menjëherë u koordinua me njërën prej tyre për të ndihmuar në shuarjen e zjarrit. Zorrën ia dha zjarrfikësit dhe ai me fëmijët shkuan në servisin e tij në anën veriore të diskotekës. Pastaj ai tha se vuri re se dera e emergjencës e “Pulse” nuk ishte e hapur. Ai dhe djali i tij shkuan në makinën e tij për të marrë çelësin e servisit dhe pastaj u kthyen dhe morën dhe vendosën maska kompresioni. Pastaj dëgjuan çatinë që filloi të çahej dhe copa të saj po binin mbi ta. Ai i tha të birit të hapte ndërtesën (servisi) për të marrë një mulli (prerës hekurash elektrik) për të prerë grilat nga tualeti “Pulse”.

Në të njëjtën kohë, ai dëgjoi një lloj zhurme, por në të gjithë situatën nuk e dinte se çfarë ishte. Pastaj vuri re se zjarrfikësit sollën një gjenerator dhe i prenë grilat.

“Djali im më solli maska me mbushje grafiti që përdorim në punën tonë. Qëndruam me maska deri në orën 5:30 të mëngjesit dhe ato maska na shpëtuan nga lëndimi. E pyeta zjarrfikësin se çfarë po ndodhte, ai më tha se kishin bërë një korridor përmes të cilit po nxirrnin njerëz nga diskoteka dhe më tha të vazhdoja të spërkatja me ujë. Djali im vazhdonte të më tregonte se kishte fëmijë të plagosur. Një fëmijë ishte ulur atje me djegie kudo. Tym dilte prej tij. Doja ta spërkatja, por më shkoi ndërmend se nuk duhet të vësh ujë mbi djegie. I dhanë ujë për të pirë”, tha dëshmitari.

Nikollov tha se ai vazhdoi të spërkatte ujë në pjesën më të lartë të strukturës së çatisë, ndërsa zjarrfikësit ishin në anën tjetër.

“Nuk kam idenë se sa kohë kaloi. I futa fëmijët në brendësi të zonës së servisit. Pastaj bëra një tretësirë me sodë buke dhe sheqer sepse fëmijët ishin shumë të tronditur”, tha dëshmitari. Deri atëherë, përshtypja e tij ishte se kishte vetëm të plagosur, por jo viktima.

“Kjo ishte deri rreth orës 5:30 të mëngjesit. Pastaj djali im më tha, babi, duket sikur ka viktima, ka trupa. E kapa dorën dhe e tërhoqa tutje. Pastaj pashë tre trupa. E vetmja gjë që mund të mendoja ishte se si t’i çoja fëmijët në shtëpi”, tha Nikollov.

Rreth orës 8 të mëngjesit, ai tha se u thirr nga policia për të hapur servisin në mënyrë që njerëzit e përfshirë në shpëtim të mund të laheshin. Në pyetjen e prokurorit nëse kishte shumë njerëz në “Pulse” atë mbrëmje, dëshmitari u përgjigj pozitivisht, duke shtuar se ky ishte rasti sepse grupi DNA po performonte. Ai konfirmoi se ishte e vështirë për njerëzit të kalonin njëri-tjetrin, dhe përveç dy parkingjeve, automjetet ishin parkuar edhe në rrugë.

Dëshmitari tha gjithashtu se nga “Pulse” filloi të dilte fillimisht tym i bardhë, dhe më pas tym i zi i dendur, i cili përhapej gjithnjë e më intensivisht. Ai gjithashtu tha se në mbrëmjen kritike kishte të mitur në ndërtesë.

Paraprakisht, dëshmitari tha se ndërsa ishin jashtë para se të fillonte zjarri, policia mbërriti rreth orës dy. Kur u pyet nga prokurori, ai tha se kishte shtatë ose tetë zyrtarë të uniformuarn, dërsa nëse eventualisht kishte ndonjë me rroba civile, nuk mundi t’i njihte. Kur u pyet nëse e kishte pyetur ndonjëherë Dejan Jovanov-Dekon pse dera ndihmëse ishte e mbyllur, ai tha se e kishte bërë këtë një herë shumë kohë më parë, dhe përgjigja që mori ishte se kjo ishte që njerëzit pa biletë të mos hynin. Nikollov tha gjithashtu se ndërsa “Pulse” po digjej, nuhaste një erë të çuditshme plastike të djegur.

Përndryshe, në fillim të dëshmisë së tij, duke iu përgjigjur pyetjeve të prokurorit, Nikollov tha se ndërtesa ku ndodhej Pulse, më parë ishte depo çantash dhe fabrikë tekstili. Ai tha se Jovanov e mori me qira në vitin 2012 dhe filloi rindërtimin e brendshëm. Ai dha një përshkrim të pamjes së ndërtesës nga brenda nga ajo që pa kur ndaloi për një bisedë dhe një cigare. Ai tha se kishte shkallë në dy nivele që të çonin në klub, dhe brenda kishte dy bare me dy platforma mbi to. Nikollov tha gjithashtu se kabareja u rinovua në vitin 2024 kur u hoqën dy tarracat dhe pati ndryshime në skenën ku performuan muzikantët. Ndaj këtyre pyetjeve reaguan avokatët mbrojtës si gjatë pyetjeve të drejtpërdrejta ashtu edhe gjatë pyetjeve të kryqëzuara. Disa prej tyre thanë se dëshmitari nuk kishte arsimimin e duhur për të folur për rinovimin e ndërtesës, për të cilën po flet dhe terminologjinë që përdor kur përgjigjet në pyetje.

Përndryshe, në marshin e 34 me radhë të Engjëjve, i mbajtur të shtunën, ata kërkuan zgjerimin e hetimit, përcaktimin e përgjegjësisë individuale dhe një shpjegim publik nga autoritetet se pse disa individë nuk janë përfshirë në procedura deri më tani.

Tetë muaj pas aksidentit, 37 të pandehur u ulën në bankën e të akuzuarve, nga të cilët 34 ishin individë dhe tre ishin persona juridikë. Pronarë baresh, menaxherë, inspektorë, roje sigurie, nëpunës civilë dhe ish-kryetarë bashkie janë akuzuar.

Zjarri në Koçan shpërtheu natën e 15-16 marsit, duke rezultuar me 63 viktima dhe duke plagosur pothuajse 200 të tjerë.

Gjykatës(e) - Gjykim - Gjyqësor Zjarri në diskotekën në Koçan