The Guardian: Nëse zbulohet se Vuçiq është i përfshirë në ngjarjet në Banjskë, mund të pasojnë sanksione për Serbinë
Nëse vërtetohet përfshirja e presidentit serb Aleksandar Vuçiq në ngjarjet afër Banjskës në Kosovë, kjo mund të ndryshojë qasjen e SHBA-së dhe BE-së në negociatat ndërmjet Beogradit dhe Prishtinës, si dhe janë të mundshme sanksione për Serbinë, shkruan gazeta britanike The Guardian.
Gazeta shton se Shtetet e Bashkuara të Amerikës deri më tani i kanë mbështetur negociatat dhe kanë qenë në anën e Evropës, pasi fajin më të madh për dështimin e tyre ia kanë ngarkuar kryeministrit të Kosovës Albin Kurti. Por administrata e Presidentit Joe Biden tani po heton përfshirjen e Beogradit zyrtar në njësinë paraushtarake dhe po përpiqet të zbulojë misionin e saj.
“Po bëhet gjithnjë e më e qartë se ka pasur një skenar të provokimit të një konflikti, në mënyrë që ushtria serbe pastaj të hyjë për të mbrojtur popullin serb në veri dhe kështu të zbatojë ndarjen e Kosovës”, tha Sonja Biserko, kryetare e Komiteti të Helsinkit për të Drejtat e Njeriut në Serbi.
“Ky operacion, pavarësisht se kush është drejtpërdrejt përgjegjës për të në Beograd, ka kaluar një vijë të kuqe që Perëndimi nuk mund ta tolerojë. Kjo situatë nuk është provokuar nga Kurti, siç kanë komentuar shumë në Beograd. Përkundrazi, ai tregoi pjekuri, dhe policia e Kosovës tregoi profesionalizëm”, shton Biserko.
Edward Joseph, ish-zëvendës shefi i misionit të OSBE-së në Kosovë, tha se nëse Beogradi qëndron pas grupit paraushtarak që sulmoi policinë e Kosovës pranë fshatit Banjska, SHBA-të do të duhet të rimendojnë qasjen e tyre ndaj rajonit.
“Çështja është se thirrjet për dialog janë bosh tani që e gjithë strategjia amerikane ka hedhur në erë – për të ushqyer Serbinë e Vuçiqit si një “partner”, tha Joseph, i cili tani është anëtar i lartë në Shkollën e Studimeve Ndërkombëtare të Avancuara të Universitetit Johns Hopkins në Uashington.
Gjenerali amerikan në pension, Wesley Clark, tha për Radion Evropa e Lirë se sulmi në Banjskë duhet të shqetësojë BE-në dhe NATO-n, sepse paraqet problem real për stabilitetin e Ballkanit.
Clark vlerëson se ngjarjet në Kosovë kanë lidhje me dhunën në Ukrainë, duke shtuar se Rusia po përdor Serbinë si agjent të saj dhe situatës së trazuar në Kosovë po i përgjigjet me luftën hibride që po udhëheq.
“Rusia do të donte më shumë destabilitet në Ballkan, gjë që do të largonte vëmendjen e NATO-s. Ajo dëshiron të tregojë se demokracia nuk funksionon”, tha Wesley Clark.
Ai shton se armët e konfiskuara nga autoritetet e Kosovës pas përleshjes në afërsi të Banjskës, në të cilën mbetën të vrarë një polic i Kosovës dhe tre sulmues të kombësisë serbe, me siguri kanë ardhur nga Serbia dhe se aksioni me siguri ka qenë i koordinuar ose të paktën i miratuar në heshtje nga specialistët serbë.
“Kush janë ata njerëz që kanë qenë në veri të Kosovës, lidhjet e tyre me forcat speciale serbe dhe autoritetet e Serbisë – kjo duhet të përcaktohet”, tha gjenerali amerikan në pension.
Ai shton se është i shqetësuar nga fakti se është zbuluar se në një manastir të Kishës Ortodokse Serbe është ruajtur një sasi e madhe armësh dhe ka shprehur shpresën se KFOR-i do të insistojë që të gjitha gjetjet të kontrollohen.
Ndryshe, presidenti i Serbisë, Aleksandar Vuçiq, ka konfirmuar mbrëmë për Radio-Televizionin e Serbisë se krimineli kontrovers kosovar dhe nënkryetari i Listës Serbe, Milan Radoiçiq, ndodhet në Serbi, duke konfirmuar kështu informacionin e dhënë më parë nga autoritetet kosovare. Mirëpo, ndryshe nga Prishtina zyrtare, Vuçiq nuk ka dhënë një përgjigje të qartë nëse Radoiçiq ishte në grupin e armatosur afër Banjskës, i cili sulmoi policinë e Kosovës.
“Milan Radoiçiq nuk u fsheh kurrë, ai nuk kishte turp për rolin e tij. Ai me siguri do t’i përgjigjet thirrjes së organeve kompetente. Gjendet në territorin e Serbisë. Ai nuk është i plagosur”, tha Vuçiq.
Në intervistën e djeshme, presidenti serb në mbrojtje të Radoiçiqit tha se ai ndodhet në pjesën qendrore të Serbisë dhe se e sheh veten si luftëtar të lirisë. Megjithatë, Vuçiq ka shtuar se ka gjëra dhe pyetje të cilave Milan Radoiçiq do të duhet t’i përgjigjet.
Duke folur për pjesëtarët e vrarë të grupit të armatosur që janë serbë, Vuçiq tha se për të ata njerëz nuk do të jenë kurrë terroristë. Ai ka shtuar se përkundër faktit se një polic shqiptar nuk ka çfarë kërkon në veri të Kosovës, nuk ka asnjë arsyetim për vrasjen e tij.