Takimi Trump-Zelensky: Ukraina është gati të gjejë “mënyrë diplomatike” për t’i dhënë fund luftës
Në takimin që po zhvillon Donald Trump me presidentin Zelensky në Shtëpinë e Bardhë, ka cilësuar se ky takim do të shkojë mirë, duke dhënë kështu sinjale pozitive lidhur me qëllimin për të cilin janë mbledhur, për paqe, shkruan Euronews.al.
“Ne kemi pasur një takim dhe mendoj se gjërat do të shkojnë mirë sot”, tha Trump.
Më tej Presidenti i SHBA-së pyetet nga gazetarët nëse kjo është dita e fundit që Amerika ofron mbështetje ndaj Ukrainës.
Trump përgjigjet duke theksuar se: “Nuk mund ta them kurrë këtë, ka njerëz dhe fëmijë që vriten dhe dua ta ndaloj këtë. Kemi hyrë në vitin e katërt të luftës dhe shumë njerëz janë vrarë, edhe javën e kaluar u vranë shumë njerëz, nga të dyja palët. Unë e njoh presidentin Putin, njoh edhe veten time gjithashtu dhe e di që edhe ai e dëshiron fundin e luftës.
Kjo nuk është lufta ime por e nisur nga Joe Biden. Ne duam ta përfundojmë këtë në të mirën e të gjithëve”, deklaroi Trump.
Trump nuk e përjashton dërgimin e trupave amerikane në Ukrainë: Duam paqe afatgjatë
Presidenti Donald Trump nuk e përjashtoi dërgimin e trupave amerikane në Ukrainë për të ndihmuar në ruajtjen e një marrëveshjeje të mundshme paqeje.
“Do t’ju njoftojmë për këtë, ndoshta më vonë sot”, tha Trump.
Hapja e tij për të lejuar trupat amerikane në terren në Ukrainë mund të sjellë një ndryshim të madh, pasi Ukraina i konsideron garancitë e sigurisë si kritike për çdo marrëveshje përfundimtare paqeje me Rusinë.
Trump tha se Evropa do të marrë drejtimin në sigurimin e paqes, por se SHBA-të do të jenë të përfshira.
“Ata janë vija e parë e mbrojtjes, sepse janë atje, në Evropë. Por ne do t’i ndihmojmë. Gjithashtu, do të jemi të përfshirë”, tha ai.
Trump tha se nëse do të kishte një marrëveshje paqeje, ajo do të zbatohej.
“Ne do të punojmë me Ukrainën, do të punojmë me të gjithë” për t’u siguruar që paqja është “afatgjatë”. SHBA-të do të punojnë si me Rusinë ashtu edhe me Ukrainën për t’u “siguruar që kjo të funksionojë”, shtoi ai.
“Nëse mund të arrijmë paqen, e di që do të funksionojë. Nuk kam asnjë dyshim për këtë”.
Zelensky: Ukraina është gati të gjejë “mënyrë diplomatike” për t’i dhënë fund luftës
Presidenti Volodymyr Zelensky tha se Ukraina është e përgatitur të gjejë një “mënyrë diplomatike” për t’i dhënë fund luftës së Rusisë, duke theksuar përsëri se Kievi dëshiron një takim trepalësh me Moskën dhe Uashingtonin.
I pyetur nëse Ukraina është gati të “rivizatojë hartat” në një marrëveshje paqeje, apo “të vazhdojë të dërgojë trupa ukrainase drejt vdekjes për disa vite të tjera”, Zelensky nuk u përgjigj drejtpërdrejt, por vlerësoi përpjekjet e administratës Trump për të ndaluar luftën.
Zelensky tha se Ukraina duhet të jetojë me sulmet e përditshme ruse, duke përmendur sulmin vdekjeprurës të Rusisë gjatë natës në Kharkiv.
“Ne duhet ta ndalojmë këtë luftë, të ndalojmë Rusinë. Dhe ne kemi nevojë për mbështetje (nga partnerët tanë amerikanë dhe evropianë)”, tha ai.
“Ne mbështetëm idenë e Shteteve të Bashkuara – të, personalisht, të Presidentit Trump – për të ndaluar këtë luftë, për të gjetur një mënyrë diplomatike për ta përfunduar këtë luftë”, shtoi ai.
Zelensky tha se ishte i përgatitur për një samit trepalësh midis tij, Trump dhe Presidentit rus Vladimir Putin. Trump ka shprehur interes për të mbajtur një samit trepalësh menjëherë pas bisedimeve të së hënës, ndërsa Putin ka hezituar.
Armë amerikane për Ukrainën: Zelensky shpreh mirënjohje ndaj programit të NATO-s
Presidenti ukrainas Volodymyr Zelensky tha se ishte mirënjohës për një program të ri të NATO-s që u lejon vendeve anëtare të blejnë armë nga Shtetet e Bashkuara për t’i dërguar në Ukrainë.
“Jemi mirënjohës për këtë program dhe këtë mundësi. Jemi mirënjohës për Evropën – ata paguajnë për këtë”, tha ai.
Presidenti i SHBA-së, Donald Trump, gjithashtu e vlerësoi programin, pasi kjo do të thotë se SHBA-të “nuk po i japin asgjë” drejtpërdrejt Ukrainës, por po i shesin pajisjet e tyre ushtarake aleatëve të Kievit.
Zelensky tha se armët amerikane ishin thelbësore për mbrojtjen e Ukrainës.
“Askush në Evropë nuk ka kaq shumë sisteme të mbrojtjes ajrore si Patriotët”, tha ai. “Ne kemi shumë nevojë për to.”
Trump vlerësoi kostumin e zi të Zelensky-t pas debateve më herët për veshjen e tij
Mes diskutimeve intensive mbi luftën dhe paqen, u vu re dhe u fol për zgjedhjen e kostumit të zi nga Presidenti ukrainas Volodymyr Zelensky.
“Dukesh fantastik me atë kostum”, tha gazetari Brian Glenn i Real America’s Voice, i cili vuri në dyshim zgjedhjen e veshjes së Zelensky-t gjatë vizitës së tij në Shtëpinë e Bardhë në shkurt.
“Thashë të njëjtën gjë”, i bashkangjitet Trump komentit të gazetarit.
“Je në të njëjtën situatë”, i tha Zelenksy Glennit. “Unë ndryshova, ti jo”, shton presidenti ukrainas.
Veshja e Zelensky-t u diskutua midis zyrtarëve amerikanë dhe ukrainas përpara bisedimeve të së hënës midis udhëheqësit ukrainas dhe Trump, tha një zyrtar evropian, me mirëkuptimin që Zelensky nuk duhet të mbërrijë i veshur me bluzën e tij të zakonshme të gjelbër ushtarake.
Trump ishte i pakënaqur kur Zelensky mbërriti në Shtëpinë e Bardhë në shkurt i veshur me uniformën e tij ushtarake, duke u tallur se ishte “veshur tërësisht”.