Sulejmani: Mbeturinat në Kodrën e Diellit nuk i ka hedhur komuna, por kompania e angazhuar nga komuna
Komuna e Tetovës nuk i ka hedhur mbeturinat ndërtimore në Kodrën e Diellit, por kompania e angazhuar për rikonstruimin e rrugës te lagja e vikend shtëpizave, Inspektorati Komunal e ka urdhëruar kompaninë që të largojë materialin e deponuar në mënyrë të paligjshme. Kështu kanë reaguar sot nga Komuna e Tetovës në lidhje me paraqitjen para mediave nga Parku Kombëtar “Mali Sharr” të cilët përmes një video materiali prezantuan para opinionit se kishin kapur një kamion i cili hidhte në natyrë mbeturinat nga rikonstruimi i rrugës së vikend shtëpizave në Kodrën e Diellit. Këtë reagim, Komuna e Tetovës e quan rast politik, shkruan Portalb.mk.
Udhëheqësi i Inspektoratit Komunal të Tetovës, Sedat Sulejmani theksoi se pas dokumentimit të rastit, Inspektorati Komunal ka urdhëruar kompaninë që merret me rikonstruimin e rrugës së vikend-shtëpizave, që sa më shpejtë të largojë materialin e depunuar në mënyrë të paligjshme në vendet e papërshtatshme.
“Rasti që ka ndodhur dje është inspektuar nga inspektorati komunal dhe është vendosur që kompania që i ka hedhur mbeturinat këtu me një urgjencë të shpejtë që t’i largojë mbeturinat. Në këtë rast nuk mund të thoni se komuna i ka hedhur mbeturinat kur komuna ka angazhuar kompani për të asfaltuar rrugën te lagja e vikend shtëpizave, ajo kompani arsyetohet se përkohësisht i ka vendosur këto mbeturina që më pas t’i bartë në vendin që duhet”, tha Sulejmani i cili shtoi se kompanisë i kanë dhënë afat dy javë që t’i largojë mbetjet.
Ai theksoi se në kontratë është që kompania t’i bartë mbeturinat në deponinë Rusino, ndërkaq edhe pse i pyetur nëse ndaj kompanisë është marrë ndonjë gjobë financiare, Sulejmani tha se e njëjta është urdhëruar vetëm t’i largojë mbetjet nga ku i ka hedhur.
Në lidhje me deklaratat e drejtorit të Parkut Nacional “Mali Sharr”, Sulejmani theksoi se reagimi i tij ishte kryekëput politik dhe duke e kritikuar atë për dëmtim të Malit Sharr.
Drejtori i PK “Mali Sharr”, Ibraim Deari dje deklaroi se Komuna e Tetovës ka treguar neglizhencë skandaloze për natyrën gjatë rikonstruimit të rrugës në lagjen e vikend shtëpizave në Kodrën e Diellit, duke i hedhur mbeturinat ndërtimore në natyrë.
“I bëjmë thirrje Komunës së Tetovës që të heqë materialin e hedhur sa më shpejt që të jetë e mundur dhe ta hedhë atë në një vend të përshtatshëm. Rojet e zonës së mbrojtur dhe policia kanë dokumentuar rastin. Kërkojmë mirëkuptim nga banorët dhe kërkojmë nga ata që të mos ndjekin hapat e Komunës së Tetovës dhe të ndotin dhe shkatërrojnë natyrën sepse kjo nuk i ngjan Parkut Kombëtar ose Qendrës Turistike Kodra e Diellit”, tha Deari.
Përndryshe, javën e kaluar filloi rikonstruimi i rrugës te lagja e vikend shtëpizave në Kodrën e Diellit, kërkesë kjo e kamotshme e qytetarëve të cilët për vite me radhë ankoheshin për infrastrukturën e dobët rrugore. Rikonstruimi i rrugës bëhet nga ana e banorëve në bashkëpunim me Komunën e Tetovës