Situata me përmbytjet në RMV po përmirësohet, por ende ka dalje nga shtrati të lumenjve dhe rrëshqitje të dheut
Pas reshjeve të dendura të shiut dhe borës që e kanë përfshirë vendin ditët e fundit, situata po qetësohet ngadalë, por, sipas informacioneve të fundit nga Qendra për Menaxhim me Kriza (QMK), ende ka shtëpi të përmbytura, sipërfaqe bujqësore dhe rrëshqitje toke në disa rrugë, veçanërisht në pjesën perëndimore të vendit, transmeton Portalb.mk.
Siç informoi QMK këtë mëngjes, në Rajonin e Pellagonisë, konkretisht në zonat e Manastirit, Mogillës dhe Novacit, ku kishte dalje të lumenjve, uji po tërhiqet gradualisht, ndërsa situata është e ngjashme në Demir Hisar, ku lumenjtë janë kthyer në shtratin e tyre. Një përjashtim në Demir Hisar është situata me lumin Crna në zonën e fshatrave Zhvan dhe Edinakovci, ku, sipas të dhënave të Qendrës deri në orën 8 të mëngjesit të sotëm, ende ka dalje të ujit dhe sipërfaqe më të mëdha bujqësore janë të përmbytura. Për shkak të dëmtimit të urës në Boishka Reka, rruga lokale për në fshatin Mrenoga është e mbyllur për trafik.
Sipërfaqe bujqësore të përmbytura si pasojë e reshjeve të rrëmbyeshme ka edhe në zonën e Resnjës, por uji po tërhiqet gradualisht. Dje, një makinë ndërtimi ndërhyri në këtë rajon për të pastruar shtratin e Lumit të Madh.
Në rajonin e Ohrit, u ndërtua një digë mbrojtëse në lumin Sushica me një ekskavator, e cila parandaloi përmbytjet e mëtejshme, por, sipas Agjencisë Qendrore të Menaxhimit të Fatkeqësive dhe Emergjencave, bodrumet dhe oborret janë ende të përmbytura në disa vende. Në fshatrat Misleshevë dhe Kalishta në rajonin e Strugës, bodrumet, oborret dhe zonat bujqësore janë gjithashtu të përmbytura, prandaj po merren masa shtesë për të sanuar pasojat dhe për të mbrojtur popullsinë.
Procesi i rehabilitimit është i ndërlikuar në fshatin Mislesheëo për shkak të pamundësisë për të ndërtuar një kanal për rrjedhjen e ujit.
Sipas QMK-së, në rajonin e Dibrës, lumi Radika ka rritur nivelin e ujit, por për momentin nuk ka rrezik përmbytjesh. Rrugët janë të kalueshme, dhe rrëshqitje të vogla toke janë regjistruar në pjesët midis Zhirovnicës dhe Dibrës dhe Dibrës – Strugës, të cilat pastrohen rregullisht.
Në Kërçovë, nivelet e ujit të lumit Zajashka dhe lumit Treska janë ulur dhe nuk ka rrezik nga përmbytjet e reja, ndërsa pastrimi, dezinfektimi dhe krijimi i kushteve minimale në shtëpitë e banorëve në rrugën “Prilepska” në qytet janë duke u zhvilluar. Për shkak të përmbytjeve të shtëpive të tyre, qindra njerëz u evakuuan dhe u sistemuan në sallën sportive “Hristo Uzunov”, ku u ofrohet kujdesi i nevojshëm.
Në Rajonin e Vardarit, konkretisht në zonat kodrinore dhe malore në rajonin e Kavadarit, është kryer ndërhyrje e mekanizuar në rrugët Kavadar – Mushov Grob – Mrezhiçko, Mushov Grob – Mihajllovo dhe Stragovë – Gorna Boshava, ku mbulesa e borës është deri në 15 centimetra.
Për shkak të reshjeve të borës, siç raportohet nga QMK, rruga midis fshatrave P’klishte dhe German është e pakalueshme për trafik. Atje ka reshje të dendura bore, të cilat e vështirësojnë trafikun dhe pastrimi i tyre është duke u zhvilluar.
Në Rajonin e Pollogut, ku një shkëmb i madh kishte rënë në rrugën midis Tetovës dhe fshatit Banjicë, rruga është pastruar dhe trafiku është kthyer në normalitet.
Ndërkohë, në rajonin e Gostivarit, në rrugën për në Mavrovë, pranë gurores, është regjistruar rrëshqitje dheu, prandaj po merren masa për pastrimin e saj.