Sindikatat në Portugali grevë të përgjithshme kundër reformës së ligjit të punës

Konfederata më e madhe sindikale e Portugalisë, CGTP njoftoi një grevë të përgjithshme më 11 dhjetor, në shenjë proteste kundër një reforme të gjerë të ligjit të punës të promovuar nga qeveria e pakicës së qendrës së djathtë, transmeton Euronews.

Kryeministri portugez, Luis Montenegro tha se reforma, e cila do të rishikojë mbi 100 nene të ligjit të punës, synon të rrisë produktivitetin dhe fleksibilitetin në tregun e punës. Ndër masat më të diskutueshme janë ulja e kufizimeve në punësimin e nënkontraktorëve, lehtësimi i procedurave të shkarkimit nga puna dhe fleksibiliteti më i madh në orarin e punës.

Sindikatat theksojnë se propozimet e qeverisë kërcënojnë të drejtat e punëtorëve dhe kërkojnë që ato të braktisen. Sekretari i përgjithshëm i CGTP-së, Thiago Oliveira gjatë një demonstrate në Lisbonë, ku njoftoi shpalljen e grevës së përgjithshme u shpreh se plani i reformës është një nga sulmet më të mëdha të ndërmarra ndonjëherë kundër punëtorëve në Portugali.

“Nëse adoptohet, kjo do ta përkeqësojë jetën e secilit prej nesh,” shtoi ai.

Mijëra protestues marshuan nëpër rrugët e kryeqytetit portugez, duke mbajtur banderola dhe pankarta me slogane: “Jo planit të reformës së ligjit të punës”. Ata brohoritën: “Nuk do të tërhiqemi, ky plan duhet të braktiset”.