RMV-ja e fitoi arbitrazhin kundër investitorit në Kazandoll dhe nuk do të paguajë dëmshpërblim 115 milionë euro, përplasje midis VMRO dhe LSDM
Në tërësi janë refuzuar paditë kundër shtetit në rastin e njohur si Kazandoll dhe me këtë është realizuar kursim i mjeteve buxhetore të qytetarëve në shumë totale prej 115.000.000 euro. Kështu ka informuar sot Qeveria e RMV-së pas mbledhjes qeveritare, raporton Portalb.mk.
“Tribunali i arbitrazhit ka sjellë aktgjykim më 21 korrik 2025 me të cilin konstatoi se të gjitha kërkesat paditore janë të pabazuara dhe i hodhi poshtë ato plotësisht”, informoi Qeveria
Paraprakisht për këtë çështje sot gjatë ditës u deklarua edhe zëvendëskryeministri Aleksandar Nikolloski nga radhët e VMRO-DPMNE, i cili tha se qeveria e mëparshme e mbylli këtë rast në vitin 2023 dhe ra dakord që shteti t’u paguante dëmshpërblim investitorëve prej 115 milionë eurosh.
“Duhet të theksoj se çështja nuk ishte e lehtë, duke pasur parasysh se qeveria e mëparshme e kishte mbyllur tashmë çështjen me argumentet përfundimtare që u zhvilluan më 18 janar 2023. Por pas ardhjes së kësaj qeverie, ne kërkuam që çështja të rihapej dhe ajo u rihap më 28 janar të këtij viti. Kur paditësit kuptuan se gjërat nuk po shkonin mirë për ta, ata ofruan një zgjidhje me qeverinë për një shumë më të vogël, e cila varionte nga 35-48 milionë euro. Ne e refuzuam atë zgjidhje, sepse ishim të bindur për argumentet tona dhe doli të ishte e saktë, domethënë, ne e fituam këtë çështje dhe Maqedonia nuk do të paguajë asnjë euro në çështjen Kazandoll”, tha Nikoloski.
Pas kësaj reagoi LSDM-ja opozitare. Ata thanë se faktet nga të cilat Nikoloski u përpoq të shpëtonte sot janë se ishte qeveria e VMRO-DPMNE-së ajo që i dha koncesionin për minierën Kazandoll kompanisë Sardiç në vitin 2015, por edhe se qeveria e LSDM-së dhe Zoran Zaev, pas revoltës së madhe të qytetarëve të Vallandovës, e ndërpreu kontratën për minierën Kazandoll në mars të vitit 2018. Që atëherë, procesi i arbitrazhit ka filluar, dhe LSDM thotë se i gjithë procesi është përfunduar nga qeveria e udhëhequr nga LSDM, megjithëse vendimi ka mbërritur tani.
“Nëse Nikoloski dëshiron të flasë për Kazandoll, ai duhet t’u shpjegojë qytetarëve: pse partia e tij e dha koncesionin në vitin 2015? Pse u injoruan protestat dhe kërkesat e popullsisë lokale? LSDM ishte dhe mbetet në anën e qytetarëve, sepse ishin ata që luftuan kundër Kazandollit.” “Falë rezistencës civile dhe vendimeve të qeverisë së LSDM-së, kjo minierë nuk ekziston”, reagoi LSDM.
Koncesioni për minierën Kazandoll u dha nga qeveria e VMRO-DPMNE-së e udhëhequr nga Nikolla Gruevski në vitin 2014.
Në gusht të vitit 2017, me iniciativën e “Shpëtim për Vallandovën”, në Vallandovë u mbajt një referendum për të ndaluar ndërtimin e minierës “Kazandoll”, por ai dështoi për shkak të pjesëmarrjes së pamjaftueshme, si dhe pengimit nga qeveria lokale dhe kryetari i komunës nga radhët e VMRO-PMNE.
Në mars të vitit 2018, kryeministri i atëhershëm Zoran Zaev tha se Qeveria kishte vendosur të ndërpresë në mënyrë të njëanshme marrëveshjen e koncesionit për shfrytëzimin e burimeve minerale me kompaninë ukrainase “Sardicç MC” për lokacionin Kazandoll në komunat Vallandovë, Bogdanc dhe Dojran. Sipas Zaev, koncesionari nuk e kishte përmbushur kushtin e marrëveshjes brenda dy viteve nga marrja e koncesionit.