Prokuroria ndërpreu hetimin për furnizimin me mazut për TEC Negotinë
Pas një hetimi njëvjeçar, prokurori publik nga Prokuroria Themelore Publike për Ndjekjen e Krimit të Organizuar dhe Korrupsionit lëshoi urdhër për ndërprerjen e hetimit në rastin që lidhet me furnizimin e mazutit për nevojat e TEC Negotinë. Provat e mbledhura nuk vërtetuan se të dyshuarit kanë kryer veprat penale për të cilat ngarkoheshin, as nuk u vërtetua ekzistenca e një vepre tjetër penale që ndiqet sipas detyrës zyrtare, transmeton Portalb.mk.
Objekt i hetimit ishte ekzistenca e një dyshimi të bazuar se në procedurat për furnizimin e mazutit për nevojat e TEC Negotinë, të zhvilluara në kushte krize energjetike, janë kryer abuzime në thirrje publike, lidhje të paligjshme të kontratave dhe anekseve, si dhe pastrim parash dhe të ardhura të tjera nga vepra penale.
Gjatë procedurës, u analizua dokumentacion i gjerë material, dokumente financiare dhe kontraktuale, konstatime dhe mendime ekspertësh, si dhe deklarata nga disa dëshmitarë, përfaqësues të SHA EMV, TEC Negotinë, si dhe përfaqësues të operatorëve ekonomikë që kishin licencë për tregti me karburante të lëngshme – mazut gjatë periudhës kritike. Provat treguan se procedurat në fjalë për prokurimin e mazutit u kryen në kushte të një krize energjetike të shpallur nga Qeveria e Republikës së Maqedonisë dhe në përputhje me përjashtimet ligjore të parashikuara në nenin 23 të Ligjit për Prokurimin Publik, me qëllim sigurimin e prodhimit të pandërprerë të energjisë elektrike.
“Hetimi përcaktoi se procedurat u kryen në mënyrë transparente. EMV synonte të përfshinte të gjithë operatorët që kishin licenca për tregti me mazut në interes të dorëzimit më të shpejtë të mazutit, me ç’rast të gjithë operatorët ekonomikë që kishin licencë u kontaktuan dhe në disa nga thirrjet publike ata u ftuan të merrnin pjesë me njoftim, dhe në disa nga thirrjet publike u botuan edhe në gazetat ditore. Deklaratat e përfaqësuesve të operatorëve ekonomikë zbuluan se disa nga kompanitë nuk morën pjesë në procedura për shkak të vlerësimeve afariste dhe ekonomike, pra për shkak të sasive të larta, garancive bankare të kërkuara dhe rreziqeve që lidhen me gjendjen e atëhershme të tregjeve të energjisë”, thonë nga Prokuroria.
Lidhur me dinamikën e furnizimit të mazutit, provat e mbledhura, dokumentacioni dhe deklaratat e përfaqësuesve të SH.A. EMV dhe TEC Negotinë zbuluan se mazuti furnizohej vazhdimisht dhe në kohë në përputhje me nevojat e termocentralit, dhe në asnjë moment procesi i prodhimit të energjisë elektrike nuk ishte vënë në dyshim. Sipas provave, gjatë periudhës kritike nuk kishte kufizime në furnizimin me energji elektrike, dhe prodhimi në TEC Negotinë mundësoi sigurimin e energjisë elektrike me çmime dukshëm më të ulëta se çmimet në tregun e lirë.
Procedura gjithashtu nuk vërtetoi se kontratat dhe anekset e lidhura i shkaktuan dëme SH.A. EMV ose Buxhetit të Shtetit. Përkundrazi, provat treguan se ndryshimet në planin vjetor të prokurimit publik dhe përfundimi i anekseve u zbatuan me vendime të organeve kompetente të SH.A. EMV, me vendime të Bordit të Drejtorëve dhe u konfirmuan me vendime të Bordit Mbikëqyrës të EMV, me qëllim sigurimin e sasive të mjaftueshme të mazutit për funksionimin e pandërprerë të TC Negotinë.
Lidhur me dyshimet për pastrim parash, hetimi përcaktoi se fondet e paguara në bazë të kontratave të lidhura nuk përbëjnë përfitime pasurore të fituara në mënyrë të paligjshme, pra nuk janë të ardhura nga një krim. Prandaj, transaksionet financiare, pagesat, blerjet e pronave dhe transferimet e fondeve midis llogarive nuk mund të konsiderohen vepra të pastrimit të parave ose fshehjes së fondeve të fituara në mënyrë të paligjshme.
Duke pasur parasysh se të gjitha provat e mbledhura nuk japin dyshim të arsyeshëm se të dyshuarit kanë kryer vepra penale që ndiqen sipas detyrës zyrtare, është lëshuar Urdhër për Ndërprerjen e Procedurës Hetimore. Personi juridik i dëmtuar ka të drejtë të paraqesë kundërshtim kundër një vendimi të tillë të prokurorisë në Prokurorinë e Lartë Publike të Shkupit brenda 8 ditëve nga data e marrjes së urdhrit për ndërprerjen e procedurës hetimore.
Për rastin në fjalë, listën e dyshuarve e përbënin gjithsej 13 persona. Drejtori i RKM Ratko Kapushevski, i cili njihet në opinion si person i afërt i Nikolla Gruevskit ishte në ndër emrat më të njohur, ndërkaq bashkë me të ishte i përfshirë edhe djali i deputetit të BDI-së, Ismail Jahoski apo pronari i Pucko Petroll, Asmir Jahoski. Në listën e të dyshuarve ndodhej edhe emri i ish drejtori të EMV-së, Vasko Kovaçevski i cili prej kohësh ndodhet në arrati për shkak të rastit tjetër ku ndiqet penalisht, të njohur si “Aditivët”. Më tej, padi penale ishte dorëzuar edhe kundër ish drejtorit të EMV-së apo funksionarit të BDI-së Ardijan Muça, por edhe kundër Erxhan Sullkoskit, biznesmeni të njohur në opinion si partner biznesi i dhëndrit të kreut të BDI-së Ali Ahmetit, Kushtrim Smajlaj. Krahas tyre, përmendeshin edhe persona të tjerë si Ruzhdi Ramadani, Nikolla Stojanovski, Danço Stojanovski, Emil Pecakov, Marija Neshkovska, Bllagica Markoviq, Dushica Seizovska Jovanoviq dhe Dobrilla Stefanovska.