Përmendorja e Qosetos, VLEN thotë se është provokim i radhës nga koalicioni Arsovska-BDI-Levica
VLEN ka reaguar për rikthimin e përmendores së Qosetos, duke e konsideruar tendencioz “në regji” të kryetares në ikje të qytetit të Shkupit, Danella Arsovska, transmeton Portalb.mk.
“Ky akt paraqet provokimin e radhës të inskenuar nga ana e aleancës së ”errët “Arsovska- BDI-Levica, dhe është tentim për të rrënuar marrëdhëniet ndëretnike duke rikthyer temat polarizuese dhe konfliktuese ndaj të cilave shoqëritë ndëretnike janë të ndjeshme. Tema e Qoseto-s u rihap në prag të fushatës për zgjedhjet lokale. A ishte ky vendim i koordinuar nga shtabi i Danella Arsovskës në Saraj? Ndërkohë që qyteti po mbytet në plehra e familje të tëra, amvisëri e biznese po jetojnë verën më të nxehtë në historinë e vendit pa ujë, Arsovska me partnerët e saj BDI dhe Levica merren me nxitjen e tensioneve ndëretnike dhe kërcënimin e stabilitetit. VLEN rikujton se përmendorja e QOSETO-s u ndërtua nga paratë e Qeverisë në të cilën Bujar Osmani dhe Blerim Bexheti ishin ministra të BDI-së si partner qeveritar. Ky akt qyqar i kryetares në ikje ka vetëm një qëllim: vazhdimin e skenarëve destabilizuese dhe përpjekje për të sfiduar stabilitetin e institucioneve”, thonë nga VLEN.
Përmendorja e Andon Lazov-Qosetos u vendos mbrëmë në rrethrrotullimin e hotelit Continental në Shkup. Kryetarja aktuale e kryeqytetit njoftoi në Facebook se vendosja e përmendores “në nder të revolucionarit maqedonas Andon Lazov Janev-Qoseto është një njohje e shpirtit të tij të palodhur” dhe vetëmohimit në luftën për një Maqedoni të lirë dhe të pavarur.
Monumenti i Andon Lazov-Qosetos ishte vendosur paraprakisht në kompleksin e Gjykatave në vitin 2014, kur Koce Trajanovski ishte kryetar i Qytetit të Shkupit.
Petre Shilegov e hoqi atë në vitin 2018, duke deklaruar se ishte ndërtim i paligjshëm.
Shilegov tha më pas se inspektorati i ndërtimit i Komunës Qendër kishte inspektuar situatën aktuale dhe kishte përcaktuar se investitori, Qyteti i Shkupit, nuk kishte vendim për ta vendosur këtë monument. Pasi u hoq, monumenti u dërgua në një depo në “Metalski zavod-Tito” në Shkup.
Qoseto është një nga pesë monumentet që Qyteti i Shkupit mori si donacion nga Shoqata për Unitetin Shpirtëror të Setincëve, Popadincëve dhe Krushoradi nga Lerini.
Kryetarja e qytetit të Shkupit, Danela Arsovska, iniciativën në Këshillin e Qytetit të Shkupit për rikthimin e përmendores e dorëzoi në gusht të vitit 2023.
Ky bust u vendos mbrëmjen mes 6 dhe 7 shtator të vitit 2014 përpara Gjykatës Supreme të Shkupit, si pjesë e projektit “Shkupi 2014” dhe si donacion i shoqatës për bashkim shpirtëror të Stinëve, Popadinëve dhe Krushoradëve nga Lerini, për tu larguar më pas mbrëmjen e 21 shkurtit të vitit 2018, ku u dërgua në depot e Fabrikës së Metalit Tito. Largimi i këtij busti u bë me urdhër të Qytetit të Shkupit.
Bëhet fjalë për personalitet kontrovers historik i cili ka shkaktuar shumë reagime në opinion, Qosja është i njohur si likuidues i VMRO-së. Ai konsiderohet ndër terroristët më të njohur të VMRO-së. Se sa njerëz ka vrarë është vështirë të thuhet. Duke u bazuar në atë se çfarë ai thotë në kujtimet e tij bëhet fjalë për më shumë se dhjetëra të vrarë. Ka jetuar 100 vjet dhe po aq ka vrarë.
Grupi i atëhershëm punues i Ministrisë së Kulturës, paraprakisht konstatoi një sërë shkljesh ligjore gjatë vendosjes së këtij busti, në mesin e të cilëve ishte edhe ligji për vendosjen e përkujtimoreve. Prokuroria Speciale Publike hapi hetim për bustet të cilat u vendosën si donacion nga shoqata, e cila ka donuar përmendoren e Qoses.