Për herë të parë në RMV, është siguruar libër shkollor mbi “Gjuhën dhe kulturën rome” për klasën e 6-të
Ministria e Arsimit dhe Shkencës (MASH) ka bërë një hap të rëndësishëm përpara në përmirësimin e arsimit të komunitetit rom, duke siguruar për herë të parë tekst shkollor për lëndën zgjedhore “Gjuha dhe kultura e romëve” për klasën e 6-të, transmeton Portalb.mk.
Kjo risi vjen pas procedurës së kryer në përputhje me njoftimin e publikuar të MASH-it, si dhe pas ndryshimeve në Ligjin për Tekstet Shkollore në Arsimin Fillor dhe të Mesëm (“Gazeta Zyrtare e Republikës së Maqedonisë”, Nr. 3 e datës 3.1.2025), të cilat ndërhynë në nenet 10 dhe 15. Këto ndryshime krijuan kushte për zgjerimin e materialeve mësimore për klasat më të larta.
“Në të kaluarën, nxënësit nga komuniteti rom kishin tekste shkollore për këtë lëndë të disponueshme vetëm nga klasa e 3-të deri në të 5-tën, gjë që përfaqësonte një kufizim në vazhdimësinë e studimit të gjuhës dhe kulturës së tyre. Teksti i ri shkollor për klasën e 6-të, me autor Daniel Petrovski, ofron për herë të parë një përmirësim të procesit mësimor. Gjithashtu është duke u zhvilluar një procedurë për zhvillimin e një teksti shkollor për klasën e 7-të”, njoftoi Ministria e Arsimit dhe Shkencës.
Paralelisht me këtë, Ministria e Arsimit dhe Shkencës miratoi një akt të ri nënligjor, Rregulloren për mënyrën e formimit të grupeve me më pak se 15 nxënës nga e njëjta klasë, me qëllim që të mundësohet studimi i gjuhës dhe kulturës së komuniteteve edhe në rastet kur numri i nxënësve është më i vogël. Rregullorja u miratua në bazë të nenit 53 paragrafi (9) të Ligjit për Arsimin Fillor.
Sipas të dhënave, lënda zgjedhore “Gjuha dhe kultura e romëve” aktualisht mësohet nga mbi 2.300 nxënës romë, të shpërndarë në 13 shkolla fillore në 7 komuna në të gjithë vendin.
Ministria e Arsimit dhe Shkencës uron 8 Prillin – Ditën Ndërkombëtare të Romëve dhe shpreh besimin e saj se politikat për promovimin e barazisë arsimore, ruajtjen e identitetit kulturor dhe rritjen e qasjes në arsim cilësor për nxënësit nga komuniteti rom do të vazhdojnë të zbatohen intensivisht.