Pas 19 janarit do të dihen emrat e ministrave në qeverinë teknike, paralajmëroi Mickoski
VMRO-DPMNE pas festës “Uji i bekuar” (19 janar) do t’i kumtojë emrat e ministrave dhe zëvendësministrave plotësues për Qeverinë teknike, raporton MIA. Deri më tani nuk ka pasur ndonjë takim mes liderit të partisë opozitare Hristijan Mickoski me kryeministrin dhe kryetarin e LSDM-së Dimitar Kovaçevski për këtë çështje dhe sipas Mickoskit nuk ka ndonjë paralajmërim.
“Pas festës ‘Uji i bekuar’ do të kemi një fotografi të plotë mbi përbërjen e ardhshme. VMRO-DPMNE ka një numër të madh të kuadrosh që mund t’u përgjigjen pozitave të kërkuara. Sa i përket performancës së qeverisë teknike, mendoj se ato qeveri deri tani janë treguar të dobëta të mbushura me konflikte dhe bllokada të shumta. Pra, a ju kujtohet ndonjë politikë progresive e zbatuar gjatë asaj periudhe, përgjigja është jo. Ajo që mbahet mend janë përplasjet. Bllokadat. Vendime të anuluara. Prandaj kjo është humbje kohe për shtetin. Prandaj propozova shfuqizimin e qeverisë teknike. Konsideroj se performanca e plotë dhe energjia reale e ndryshimeve do të dëshmohet pas ndryshimit të qeverisë dhe formimit të një qeverie legjitime dhe stabile”, deklaroi Mickoski në intervistën për Pres24.
I pyetur nëse Naqe Çulev do të jetë përsëri ministër i Punëve të Brendshme në qeverinë teknike, ai tha se nuk thotë jo, por që duhet të pritet sepse “ende nuk është marrë ndonjë vendim”.
Lidhur me bisedimet e paralajmëruara me Kovaçevskin tha se nuk kanë pasur takim dhe siç thotë Mickoski, “nuk ka diçka si paralajmërim publik për takim të fshehtë” dhe konsideron se nuk ka nevojë që të takohen në kurrfarë takime të fshehta.
“Nuk e di për Kovaçevskin, por unë me të nuk kam asgjë sekrete për të ndarë. Unë e kuptoj atë. Ai dëshiron të kemi një takim, pastaj ai në partinë e tij t’ju tregojë punë që nuk kanë ndodhur, t’ju jep shpresë të rreme dhe kështu të krijojë imazhin e një lloj uniteti, në mënyrë që ta mbajë partinë në të cilën ka pakënaqësi të dukshme. Këto janë punët e tyre, por unë e di se kurdo të kemi takim për këtë do të njoftohet opinioni”, tha Mickoski.
Komenti i tij për përbërjen e qeverisë teknike thotë se është identike me atë të qeverisë aktuale. Dallimi, shton ai, është që ministri gati dhjetëvjeçar për Punë të Brendshme Spasovski do të zëvendësohet nga krahu i tij i djathtë, shefi i kabinetit të tij.
“Nëse bëhet fjalë për performancën e tij, konsideroj se këtu dardha nuk do të bjerë larg pemës dhe do të kemi të bëjmë me të njëjtët njerëz që ndajnë të njëjtat vlera dhe pikëpamje. Maqedonia deri më tani nuk ka pasur një qeveri kaq tmerrësisht të keqe që solli jetë më të keqe”, ka thënë lideri i VMRO-DPMNE-së.
Ndryshe, takimi me liderin e VMRO-DPMNE-së, Hristijan Mickoski, do të bëhet vitin e ardhshëm, para apo pas festave, tha më 29 dhjetor kryeministri dhe kryetari i LSDM-së, Dimitar Kovaçevski. Ai tha se të gjitha detajet e qeverisë teknike do të dihen më së voni deri më 25 janar.
Kovaçevski sqaroi se LSDM-ja këtë javë i ka kaluar të gjitha procedurat për kandidatët partiakë për qeverisjen teknike. Jovan Mitreski është kandidat i LSDM-së për kryetar të Kuvendit deri në fund të mandatit të përbërjes parlamentare 2020-2024, njoftoi partia në pushtet. Si kandidate për zëvendëskryeministër përgjegjëse për politikat për qeverisje të mirë, Këshilli Qendror përcaktoi Sllavica Gërkovskën. Për zëvendëskryeministër për çështje ekonomike, për koordinimin e departamenteve ekonomike dhe investimeve u zgjodh Fatmir Bytyqi, për zëvendëskryeministër për çështje evropiane u zgjodh Bojan Mariçiq, ndërsa kandidate për ministre të kulturës u zgjodh Bisera Kostadinovska Stojçevska.
Kandidat për Ministër të Mjedisit Jetësor dhe Planifikimit Hapësinor u zgjodh Kaja Shukova, për Bujqësi Ljupço Nikolovski, për transport dhe lidhje Blagoj Boçvarski, ndërsa për mbrojtjes Slavjanka Petrovska.
Me 4 dhjetor, liderët e partive parlamentare arritën marrëveshje për datat e zgjedhjeve presidenciale dhe parlamentare që do të mbahen vitin e ardhshëm. Raundi i parë i garës për kreun e shtetit do të mbahet më 24 prill, kurse raundi i dytë së bashku me zgjedhjet parlamentare më 8 maj. Edhe 24 prilli dhe 8 maji 2024 janë ditë e mërkurë.
Kryeministri Kovaçevski pas takimit tha se sipas ligjit nga 28 janari do të ketë Qeveri teknike, përkatësisht Qeveri të Përzhinos dhe do të përmbushet obligimi ligjor që ka si kryeministër.