Mickoski: Ka naftë, qeveria do të ndërhyjë menjëherë nëse ka një rritje dramatike të çmimeve
Kryeministri Hristijan Miskoski tha sot se, ka mjaftueshëm naftë dhe derivate të naftës, qytetarët duhet të jenë të qetë dhe qeveria do të ndërhyjë menjëherë nëse ka rritje dramatike të çmimeve, transmeton Portalb.mk.
Ai tha se, ka pasur një takim me distributorët kryesorë të naftës dhe derivateve të naftës dhe përfundimi i përbashkët ishte se ka mjaftueshëm naftë dhe derivate të naftës.
“Qytetarët duhet të jenë të qetë, këtu çmimi është dramatikisht më i ulët se në fqinjësi. Nëse një litër në Serbi është 120 denarë, këtu është 70, njësoj nëse e krahasojmë me Kosovën, Shqipërinë. Edhe një herë, si qeveri, tregojmë se standardi i qytetarëve tanë është mbi të gjitha. Nëse ka një rritje dramatike të çmimit të naftës dhe derivateve të naftës, Qeveria menjëherë, të martën, në një seancë të rregullt, do të ndërhyjë. Kemi disa mundësi – nëse do të ulim akcizën ose TVSH-në, absolutisht do të ngrihemi në mbrojtje të asaj që është në interesin tonë, dhe ky është standardi i qytetarëve tanë”, tha Mickoski.
Ai konfirmoi se kishte informacione për ndalime të supozuara të mbushjes së naftës në disa pika karburanti pas orës 22:00, por inspektorët, siç informoi ai, janë vazhdimisht në terren.
“Kishte informacione të tilla, Inspektorati Shtetëror i Tregut është në terren, kemi informacione për atë që po ndodh, çdo sjellje devijante do të sanksionohet në përputhje me ligjin. Ne si qeveri absolutisht qëndrojmë pas qytetarëve, ata janë interesi ynë që duhet të mbrohet dhe këtë e kemi bërë për gati dy vjet”, përsëriti Mickoski.
Sipas tij, rezervat shtetërore janë afërsisht mbi 62 ditë, sa i përket konsumit total ditor të naftës dhe derivateve të naftës, gjë që nuk është problem dhe janë në nivelin më të lartë historik në përputhje me ligjin, duhet të ketë një metodologji se si të arrijmë 90 ditë.
“Kjo nuk do të thotë se duhet ta kemi për momentin, por po kryhet përmes Ministrisë, dhe ne e kemi miratuar atë metodologji, dhe do të arrijmë 90 ditë”, tha Mickoski.
I pyetur nëse është i shqetësuar për një tronditje të re të inflacionit, si pasojë e luftës në Lindjen e Mesme, kryeministri tha se Qeveria po e monitoron nga afër situatën dhe do të ndërhyjë nëse është e nevojshme.
Kujtojmë se në Maqedoni u mblodh Këshilli i Sigurisë, pas çka u konstatua se situata aktualisht është e qëndrueshme dhe e sigurt.
Mëngjesin e 28 shkurtit Izraeli filloi sulmin ndaj Iranit, ndërsa më pas u bashkëngjitën edhe Shtetet e Bashkuara të Amerikës.
Sulmet nisën teksa bisedimet mes Washingtonit dhe Teheranit për programin bërthamor të Iranit kanë qenë në vazhdim nën ndërmjetësimin e Omanit, raundi i fundit i bisedimeve në përfundoi të enjten në Gjenevë.