Mbi 30 të vdekur nga zjarret në Havai
Të paktën 36 persona kanë vdekur nga pasojat e zjarrit në Lahaina të Havait, shkroi të mërkurën në mbrëmje qarku Maui në një deklaratë të postuar në faqen e internetit, transmeton Zëri i Amerikës.
Zjarret e furishme të përhapura nga erërat e forta të uraganit Dora përfshinë ishullin Maui, duke lënë prapa makina të djegura në rrugët dikur të frekuentuara dhe grumbuj rrënojash që nxirrnin tym aty ku ishin ndërtesat historike. Flakët shpërthyen duke detyruar banorët të zhyten në oqean për të shpëtuar.
Zyrtarët thanë më herët se 271 struktura u dëmtuan ose u shkatërruan dhe dhjetëra njerëz mbetën të plagosur.
Gjeneralmajori Kennneth S. Hara, i Departamentit të Mbrojtjes së shtetit të Havait tha se erërat e forta e bënë veçanërisht të vështirë luftimin e zjarrit, duke nënvizuar se era ishte aq e fortë sa helikopterët nuk të ngriheshin për të shuar zjarret.
Presidenti Joe Biden tha se ka urdhëruar angazhimin e të gjitha mjeteve federale për të ndihmuar operacionet e kërkim shpëtimit dhe se Garda Kombëtare e Havait ka mobilizuar helikopterët Chinook për të ndihmuar në shuarjen e zjarreve.
Lutjet tona janë me ata që kanë parë shtëpitë, bizneset dhe komunitetet e tyre të shkatërruara”, tha presidenti Biden në një deklaratë.