Kandidati i VLEN-it për kryetar të Gostivarit dhe Azir Aliu mysafirë të VMRO-DPMNE-së në tubim, Kasami: Kemi bashkëpunim të ndërsjellë (Video)

Kandidati i koalicionit VLEN për kryetar të Komunës së Gostivarit, Sebaedin Dauti dhe ministri i Shëndetësisë Azir Aliu, mbrëmë kanë marrë pjesë në tubimin e VMRO-DPMNE-së në Gostivar, shkruan Portalb.mk.

Dauti dhe Aliu kanë marrë pjesë si mysafirë në këtë tubim, kështu tha në fjalimin e saj deputetja e VMRO-së, Dafina Stojanoska.

“I nderuar ministër i Shëndetësisë Azir Aliu dhe kandidat për kryetar të Gostivarit Sebaedin Dauti. Këta janë njerëzit që sonte janë mysafirët tanë dhe njerëzit të cilët vijnë nga partia VLEN, e cila i rezistoi presioneve dhe sfidave të BDI-së kriminale”, tha Stojanoska në fjalimin e saj.

Njëri nga liderët e VLEN-it, Bilall Kasami e konfirmoi se kanë bashkëpunim me VMRO-në për përkrahje të ndërsjellë në komunat ku nuk kanë kandidatë. 

“Kemi bashkëpunim edhe me partnerët e koalicionit për përkrahje të ndërsjellë të kandidatëve aty ku nuk kemi kandidatët tonë”, tha Kasami. 

Këto zgjedhje VMRO-DPMNE nuk ka kandidat për kryetar të Komunës së Gostivarit dhe Tetovës.

Kujtojmë se VMRO-DPMNE dhe VLEN janë partnerë koalicioni në qeverinë aktuale të RMV-së. 

Ndryshe, këto janë zgjedhjet e teta lokale që nga pavarësia e vendit. 

Rrethi i parë do të mbahet më 19 tetor, ndërsa rrethi i dytë më 2 nëntor. 

Fushata për rrethin e parë ka filluar më 29 shtator dhe do të zgjasë deri më 17 tetor, ndërsa fushata për rrethin e dytë do të vazhdojë deri më 31 tetor.