“Jashtë amerikanët”, protestat kundër Trumpit pas deklaratave për ndërhyrje në Kolumbi

Mijëra protestues kanë dalë në rrugët e qyteteve anembanë Kolumbisë për të dënuar kërcënimet e Donald Trump për të zgjeruar fushatën e tij ushtarake në Amerikën e Jugut në territorin e tyre, pas sulmit vdekjeprurës të fundjavës së kaluar në Venezuelë, transmeton Euronews.

Në Cúcuta, një qytet në kufirin lindor të Kolumbisë me Venezuelën, disa qindra demonstrues marshuan drejt katedrales së shekullit të 19-të duke valëvitur flamurin e verdhë, blu dhe të kuq të vendit dhe duke bërtitur: “Fuera los yanquis!” (“Jashtë amerikanët!”)

Sulmi i SHBA-së ndaj Venezuelës do të përcaktojë drejtimin e pasurisë së madhe minerale të Amerikës së Jugut

“Trump është djalli… ai është personi më i neveritshëm në botë”, tha një demonstruese, një biznesmene 55-vjeçare e quajtur Janet Chacón.

Presidenti i Kolumbisë, Gustavo Petro, thirri tubimet e së mërkurës pasi Trump tregoi se favorizonte idenë e veprimeve ushtarake në Kolumbi, pas sulmit të guximshëm të së shtunës në kryeqytetin e Venezuelës. Presidenti i Venezuelës, Nicolás Maduro, dhe zonja e parë Cilia Flores u kapën, ndërsa dhjetëra truproja kubanezë dhe venezuelianë u vranë, gjatë bastisjes të forcave speciale amerikane në një bazë ushtarake në Karakas.

“Ajo që ndodhi në Venezuelë ishte e paligjshme”, u tha Petro mijëra mbështetësve që ishin mbledhur në një tubim në sheshin Bolívar në kryeqytetin e Kolumbisë, Bogota.

Përpara skenës, një protestues mbante një pankartë ku shkruhej: “Shkoni në djall, ju të ndyrë”. Megjithatë, Petro mori një qëndrim më pak luftarak pasi foli me Trumpin për herë të parë, pak para deklaratës së tij publike.

“Ishte një nder i madh të flisja me presidentin e Kolumbisë … E vlerësova telefonatën dhe tonin e tij dhe mezi pres ta takoj në të ardhmen e afërt”, shkroi Trump në platformën e tij të mediave sociale Truth Social.

Petro tregoi se ishte i gatshëm të takohej me Trumpin, por shtoi: “Nuk mund ta ulim vigjilencën tonë”.