Ambasadori suedez Ola Sohlstrom: ‘Reforma, reforma, reforma’, është ky mesazhi ynë për Maqedoninë e Veriut (VIDEO)
Ambasadori i Suedisë në Maqedoninë e Veriut, Ola Sohlstrom, në një intervistë për Portalb.mk ka rikonfirmuar pozicionin e vendit të tij si një kampion evropian i zgjerimit të Bashkimit Evropian, duke theksuar mbështetjen e plotë për rrugëtimin eurointegrues të vendit. Ai deklaroi se Suedia dëshiron ta shohë Maqedoninë e Veriut sa më shpejt të jetë e mundur si anëtare me të drejta të plota në familjen evropiane. Në këtë kontekst, ai mirëpriti dokumentin e përbashkët (non-paper) të Francës dhe Gjermanisë si një kontribut shumë të dobishëm dhe konstruktiv në debat, duke shpjeguar se ky hap tregon interesin e vërtetë të institucioneve dhe shteteve më të mëdha anëtare të BE-së për të ecur përpara me këtë proces sa më shumë që të jetë e mundur.
Lidhur me procesin e bisedimeve, ambasadori dha një porosi të qartë dhe të prerë për qeverinë vendase, duke përsëritur thirrjen ndaj Qeverisë së RMV-së të bëjnë “reforma, reforma, reforma”.
Ai vuri në dukje se reformat nuk janë një proces që bëhet vetëm një herë, por një angazhim i vazhdueshëm për të qëndruar konkurrues, relevantë dhe për të çuar shtetin përpara. Sipas tij, reformat në fushën e luftës kundër korrupsionit, qeverisjes së mirë, sundimit të ligjit, transparencës dhe llogaridhënies janë jetike dhe përbëjnë kapitujt kryesor apo “fundamentalet” janë të parët dhe të fundit që shqyrtohen në negociata. Ambasadori porositi që këto reforma të vazhdojnë me shpejtësi të plotë përpara dhe të mos mbeten thjesht një plotësim formal i kutive, pasi ato janë ajo që njerëzit vërtet duan dhe presin në shoqërinë e tyre.
Një tjetër pikë me rëndësi të veçantë e trajtuar në intervistë është çështja e fushatave dezinformuese që zhvillohen nga qendra të ndryshme për të rritur euro-skepticizmin në vend. Sohlström tërhoqi vëmendjen se këto fushata mashtruese, plot me pasaktësi faktike dhe gjëra jashtë kontekstit, synojnë të minojnë përpjekjet reformuese dhe rrugën e vendit drejt BE-së. Si një vend kampion në luftimin e dezinformimit, Suedia rekomandon një qasje të tërë shoqërisë, ku kërkohet rritja e edukimit mediatik, një qasje më kritike nga individët ndaj lajmeve që konsumojnë, si dhe përdorimi i mjeteve teknologjike për të filtruar dezinformatat, duke e cilësuar këtë si një çështje serioze të sigurisë.
Ambasadori u ndal te mundësitë dhe mbështetja konkrete që kjo ambasadë ofron për vendin, veçanërisht përmes programeve që synojnë fuqizimin e rinisë dhe bashkëpunimin ekonomik. Ambasada suedeze menaxhon një program zhvillimor ambicioz që ofron ekspertizë, marrëveshje binjakëzimi në fusha si statistika e policia, si dhe trajnime profesionale për të rinjtë në bashkëpunim me kompani të mëdha suedeze. Për më tepër, Suedia hap dyer të rëndësishme për zhvillimin ekonomik duke inkurajuar rritjen e numrit të kompanive suedeze në vend, si dhe duke ftuar sipërmarrësit dhe kompanitë maqedonase që të shfrytëzojnë mundësitë e tregut suedez prej 10 milionë konsumatorësh, i cili shërben si një portë e shkëlqyer drejt mbarë rajonit nordik dhe tregut të BE-së.