Aggeler: Nuk më inkurajon ajo çfarë e shoh në gjyqësor, nga kryeministri pres më pak fjalë dhe më shumë vepra
Ambasadorja amerikane në Maqedoninë e Veriut, Angela Aggeler, në intervistën e saj në emisionin “Click Plus” në TV21, foli ashpër për gjendjen në sistemin gjyqësor, si dhe për qasjen e kryeministrit Hristijan Mickoski ndaj Prokurorisë, transmeton Portalb.mk.
Aggeler rikujtoi se SHBA deri tani kanë investuar “gjysmë miliardi euro” në gjyqësor, por rezultatet ende nuk janë në nivelin e pritur.
“Nuk më pëlqen aspak situata në gjyqësor. Dua të shoh më pak deklarata nga kryeministri dhe më shumë veprim konkret në kuadër të sistemit gjyqësor”, theksoi Aggeler, duke shtuar se fokusimi tek deklaratat publike nuk i zgjidh problemet sistemike.
Ajo sqaroi se, edhe pse kryeministri nuk duhet drejtpërdrejt të zgjedhë prokurorë, ai ka përgjegjësi politike për të siguruar funksionimin e sistemit.
“Politikanët flasin për shumë gjëra, kjo është pjesë e rolit të tyre. Por në fund, kur shihen rezultatet, konfirmohet se ka ngecje”, shtoi Aggeler.
Ambasadorja u shpreh se e ka inkurajuar arrestimi i fundit i lidhur me keqpërdorimet e fondeve IPARD, por theksoi se përgjegjësia nuk mund të reduktohet vetëm te një person.
“Kemi investuar shumë vite dhe shumë para. Tani njerëzit e këtij vendi dhe kjo qeveri duhet të tregojnë rezultate”, tha ajo, duke shtuar se institucionet duhet të jenë motori i reformave, e jo përplasjet politike.
Kujtojmë se kryeministri Hristijan Mickoski vazhdimisht e përmend shkarkimin e kryeprokurorit të shtetit Ljubomir Koecvskit si dhe përmes deklaratave të tij sulmon gjykatësit dhe prokurorët.
Në shkurt të këtij viti Qeveria inicioi procedurën për shkarkimin e prokurorit publik të shtetit Ljupço Kocevski, pikërisht një vit pasi ai ka marrë këtë pozitë. Pas kalimit të seancës së qeverisë, propozimi për shkarkimin e Kocevskit mbërriti në Këshillin e Prokurorëve Publikë në fillim të marsit.
Propozimin për shkarkimin e tij Kocevski e ka marrë më 6 mars, dhjetë ditë para tragjedisë në Koçan. Në ndërkohë ai është dashur të vendosë për mocionin për shkarkim, ndërsa Këshilli i Prokurorëve Publikë është dashur të japë mendim brenda 15 ditëve. Megjithatë pas tragjedisë në Koçan shkarkimi i tij ngeci.