Aeroporti i Ohrit u legalizua pas 60 vitesh funksionim, mori patentë pronësie
Aeroporti i Ohrit, i cili funksion që nga vitet 1970, më në fund është legalizuar, njoftoi Ministri i Transportit, Aleksandar Nikolloski, përmes rrjetit Facebook. Ai theksoi se në vijim pritet modernizimi dhe rikonstruksioni i këtij aeroporti, transmeton Portalb.mk.
Sipas tij, gjatë vitit të kaluar, një ekip nga Ministria e Transportit, SHA Aeroporte dhe TAV, së bashku me Kadastrën, Avokaturën e Shtetit, Administratën për Çështje Pronësore dhe institucione të tjera qeveritare, punuan për të regjistruar aeroportin e Ohrit “Shën Apostull Pavli” në kadastrën e pronave dhe për të dhënë përfundimisht këtë objekt strategjik një patentë pronësie.
Sipas Nikolloskit, në kushte normale kjo nuk do të përbënte lajm, por pas kaq vitesh neglizhencë dhe lënie pas dore të kapitalit shtetëror, publiku duhet të informohet për këtë.
Ai gjithashtu njoftoi se pritet modernizimi dhe rikonstruksioni i aeroportit të Ohrit.
Kujtojmë se, më 24 shkurt 2025, Qeveria e Maqedonisë së Veriut miratoi rikonstruksionin e Aeroportit të Ohrit “Shën Apostulli Pali” me vlerë 2.7 milionë euro.