Zjarr i madh te një fabrikë në Kosovë dhe te një treg në Shqipëri

Është përfshirë nga flakët fabrika e dyshekëve, “Comodita” në Gjakovë. Zjarrfikësit kanë dalë në vendin e ngjarjes dhe po tentojë ta lokalizojnë zjarrin, raporton Koha.net. Policia e Kosovës ka njoftuar se sipas informatave të pranuara deri tash nuk raportohet për të lënduar, por se verifikimi do të vazhdojë.

“Rreth orës 16:50, jemi njoftuar se në rrugën “Gjergj Sokoli” në Gjakovë një fabrikë është përfshirë nga zjarri. Njësitet policore dhe zjarrfikësit kanë dalë menjëherë në vendin e ngjarjes dhe janë duke ndërmarrë të gjitha masat e nevojshme për lokalizimin dhe shuarjen e zjarrit. Zjarri është i përmasave të mëdha dhe ekipet emergjente vazhdojnë punën për ta vënë situatën nën kontroll. Deri në këto momente, bazuar në informatat e pranuara, nuk raportohet për persona të lënduar, megjithatë verifikimi i plotë i situatës dhe i pasojave eventuale në njerëz do të bëhet pas shuarjes së plotë të zjarrit”, ka thënë për KOHËN Sheremet Elezaj, zëdhënës i Policisë për rajonin e Gjakovës.

Fitim Agushi nga njësitet e zjarrfikësve në Gjakovë ka thënë se kanë kërkuar përforcim nga komunat e tjera për të ndihmuar në fikjen e zjarrit.

Ndërkaq “Comodita Home” në një njoftim publik ka bërë të ditur se punëtorët janë evakuuar me kohë dhe nuk ka ndonjë të lënduar.

“Aktualisht, ende nuk janë konstatuar shkaqet e ndezjes së zjarrit dhe nuk mund të përllogaritet vlera e dëmit material”, thuhet në njoftim.

Kryetari i Gjakovës, Ardian Gjini, ka thënë se po luftohet për ta mbrojtur një nga pjesët vitale të prodhimit, që deri tash nuk është dëmtuar.

Ai ka vlerësuar zyrtarët e emergjencave, teksa ka thënë se “Comodita” është punëdhënësi më i madh në Gjakovë dhe në krye të taksapaguesve.