U gjetën 10 detonatorë në veri të Kosovës, Sveçla akuzon Serbinë për planifikim sulmesh 

Policia e Kosovës, në bashkëpunim me KFOR-in, ka gjetur 10 detonatorë ndezës me kabllo pranë fshatit Gnjezhdan në Leposaviq, transmeton Portalb.mk. 

Pas këtij rasti, ministri në detyrë i Brendshëm, Xhelal Sveçla, akuzoi Serbinë se po planifikon sulme terroriste në Kosovë përmes “bandave kriminale e terroriste”. 

Ai tha se reagimi i shpejtë i Policisë dhe institucioneve të sigurisë ka ndaluar përdorimin e këtyre mjeteve, të cilat, sipas tij, mund të shkaktonin “sulme të rrezikshme terroriste”. 

Policia e Kosovës ka nisur hetimet dhe ka njoftuar prokurorin e shtetit. 

Tensionet në veri të Kosovës vazhdojnë që nga 24 shtatori 2023, kur një grup serbësh të armatosur sulmoi Policinë e Kosovës në Banjskë, duke vrarë një rreshter.

Më pas u vranë tre pjesëtarë të grupit sulmues.

Që nga ajo kohë, autoritetet kosovare kanë sekuestruar disa herë armë dhe municion në veri. 

Për sulmin në Banjskë u deklarua përgjegjës Millan Radoiçiq, ish-nënkryetar i Listës Serbe. 

Kosova fajëson Serbinë për këtë ngjarje, ndërsa Beogradi mohon përfshirjen. 

Prokuroria Speciale e Kosovës ngriti aktakuzë ndaj 45 personave, përfshirë Radoiçiqin. Serbia refuzon ta ekstradojë dhe thotë se do ta gjykojë vetë, ndërsa autoritetet kosovare pretendojnë se ai është nën mbrojtjen e Beogradit.